Қазақстанда «Жас сақшы» полициялық сыныптарының алғашқы түлектері марапатталды. Өткен оқу жылында үш профильді сыныпты 52 оқушы бітірді. Олардың барлығы болашақта ішкі істер органдарында қызмет ету үшін ІІМ университеттеріне түсуге шешім қабылдаған. Бұл туралы Qazaqyia.kz порталы Polisia.kz басылымына сілтеме жасап хабарлайды.
«Жас сақшы» сыныптарының алғашқы шығарылымдары еліміздің бірнеше облысында өтті. Өңірлік полиция департаменттерінің басшылары балаларға сертификаттарды жеке табыс етті: Алматыда 11-сынып оқушыларына қалалық полиция бастығы Айдын Қабдулдинов келді, ал Ақтөбе облысында балаларға ДП бастығы Қайыркен Әлиев ақ батасын берді.
«Полициялық сыныптарда оқу көшбасшылық қасиеттерді, тәртіпті, мемлекеттік рәміздер мен ұлттық құндылықтарға құрметті дамытуға, сондай-ақ ел болашағы үшін жауапкершілік сезімін қалыптастыруға ықпал етеді», — делінген хабарламада.
Қазақстанда 267 «Жас сақшы» сыныбы жұмыс істейді, онда бес мыңнан астам оқушы білім алады.
Бұған дейін «Курсив» әрбір мектепке 8 мыңнан астам құқық қорғау органы қызметкері бекітілгенін, олар кәмелетке толмағандар арасында үнемі сабақ өткізетінін жазған. Олардың міндеті — балалардың мұғалімдермен жанжалдасуына жол бермеу.