Ауыл шаруашылығы вице-министрі Азат Сұлтанов Қазақстанның ішкі нарығындағы ет бағасының жағдайы мен олардың одан әрі өсу перспективаларына қатысты пікір білдірді. Бұл туралы Qazaqyia.kz порталы Kursiv Media басылымына сілтеме жасап хабарлайды.
Вице-министрдің айтуынша, ведомство бұрын бағаны тұрақтандыру үшін шаралар қабылдаған — аналық мал басын шығаруға шектеулер және сыртқы нарықтарға ет экспортына квоталар енгізілген.
«Әсері бар, тиісінше, біріншіден — бағаны тұрақтандыру, екіншіден — біз тіпті бағаның біршама төмендегенін көріп отырмыз», — деп атап өтті Сұлтанов.
Бағаның одан әрі өсуі мүмкін бе деген сұраққа вице-министр өсім жоспарланбағанын сенімді түрде мәлімдеді.
«Ішкі нарықтағы осы әлеуметтік маңызы бар өнімнің бағасы тұрақты болады. Өсімді көріп отырған жоқпыз, ең болмағанда, менің болжамым — қажет болған жағдайда біз жедел шаралар қабылдаймыз», — деді ол.
Ет қазақстандықтар үшін қолжетімсіз өнімге айналып бара ма деген сұраққа жауап бере отырып, Сұлтанов министрлік өндіріс өзіндік құнын және ауыл шаруашылығы тауарын өндірушілердің тәуекелдерін ескеруге мәжбүр екенін түсіндірді.
«Неліктен еттің кейбір түрлерінде өсім бар? Себебі біз жем-шөп бойынша маусымаралық кезеңге өтіп жатырмыз, фермерлер жем-шөп ресурстарының ішкі бағасының әсерін сезінеді — бұл бидай, арпа, және мұның бәрі өнімнің өзіндік құнына әсер етеді», — деп түсіндірді вице-министр.
Сонымен қатар, бір жыл ішінде ет пен құс етінің бағасы 17,6%-ға өсіп, азық-түлік өнімдері арасында инфляцияға ең үлкен үлес қосты. Қой еті, сиыр еті және тартылған ет әлеуметтік маңызы бар өнімдер арасында баға өсімі бойынша көшбасшы болып қалуда.