«Қазгидромет» Қазақстанның көп бөлігінде дауылды ескерту жариялады. Синоптиктердің мәліметінше, ауа райының күрт нашарлауы күтіледі: солтүстік-батыс циклон елге қатты жаңбыр, найзағай, бұршақ және екпінді жел әкеледі. Бұл туралы Qazaqyia.kz порталы Kursiv Media басылымына сілтеме жасап хабарлайды.
Қатты жауын-шашын елдің батысында, солтүстік-батысында, солтүстігінде және орталық аймақтарында болжанады. Дауылды ескерту аймағына Астана, Ақмола, Қостанай, Солтүстік Қазақстан, Батыс Қазақстан, Атырау, Ақтөбе, Қарағанды, Павлодар, Маңғыстау облыстары, сондай-ақ Ұлытау, Абай және Шығыс Қазақстан облыстары кіреді.
Бұл өңірлерде нөсер, найзағай, кей жерлерде бұршақ және екпінді жел күтіледі, желдің жылдамдығы секундына 20-28 метрге жетуі мүмкін. Астанада қатты жаңбыр, найзағай, бұршақ және секундына 20 метрге дейін екпінді жел болжанады.
Найзағайлы жаңбыр Алматы, Түркістан, Жамбыл, Қызылорда облыстарында және Жетісу облысында да өтеді. Оңтүстік аймақтарда кей жерлерде шаңды дауыл болуы мүмкін.
Ауа райының қолайсыздығымен қатар бірқатар облыстарда аномальды ыстық сақталады. Алматы, Павлодар, Шығыс Қазақстан облыстарында, сондай-ақ Жетісу және Абай облыстарында ауа температурасы 35-38 градусқа дейін көтеріледі.
Павлодар және Шығыс Қазақстан облыстарының оңтүстігінде, Жетісу облысының солтүстігінде, Қарағанды облысының оңтүстік-шығысында және Абай облысының кейбір аудандарында термометр бағандары 40-41 градусқа жетуі мүмкін.
Ыстыққа байланысты елдің көптеген аймақтарында өрт қаупі жоғары және төтенше деңгейде сақталады. Ең күрделі жағдай Жетісу, Абай, Ұлытау облыстарында, сондай-ақ Ақмола, Қарағанды, Павлодар, Шығыс Қазақстан, Қостанай, Атырау, Қызылорда, Жамбыл, Алматы және Ақтөбе облыстарының кейбір аудандарында күтіледі.
Алдыңғы күні «Қазгидромет» мегаполистерде 29 маусымға арналған ауа райы болжамын жариялаған болатын.