Қазақстанда алғаш рет мәнерлеп сырғанаудан Төрт құрлық чемпионаты өтеді. Бұл туралы Qazaqyia.kz порталы Sputnik Қазақстан басылымына сілтеме жасап хабарлайды.
Халықаралық конькишілер одағының (ISU) президенті Чжэ Ёль Кимнің айтуынша, Орталық Азия жанкүйерлері әлемдік деңгейдегі спортшылардың өнерін өз көзімен көре алады.
«Біз мәнерлеп сырғанаудан Төрт құрлық чемпионатын алғаш рет Қазақстанда өткізетінімізге қуаныштымыз. Бұл – Орталық Азия жанкүйерлері үшін әлемдік деңгейдегі жарысты тамашалап, өз кумирлерінің өнерін жақыннан көруге берілген тамаша мүмкіндік. Қазақстанда мәнерлеп сырғанауға деген қызығушылық жаңа деңгейге көтерілді. Астана спортшылар, жанкүйерлер және барлық қатысушы үшін жоғары деңгейдегі алаң болатынына сенімдіміз»,– деді Чжэ Ёль Ким.
Беделді халықаралық дода 2027 жылдың 9-14 ақпан күндері ұйымдастырылады деген жоспар бар. Сол кезде Қазақстан астанасына Азия, Солтүстік және Оңтүстік Америка, Африка мен Мұхит аралдары елдерінен әлемнің ең үздік спортшылары келеді. Олар маусымның маңызды жарыстарының бірінде бақ сынайды.
Айта кетері, бұған дейін елімізде 2011 жылғы қысқы Азия ойындары мен 2017 жылғы қысқы Универсиада аясында мәнерлеп сырғанау жарыстары ұйымдастырылғанымен дәл осындай деңгейдегі чемпионат алғаш рет өткізілмек.