Қазақстанда бүгінде дәнді дақылдар алқабының 72,5%-ы жиналып, жалпы 16,2 млн тонна астық бастырылды. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Бұл деректер премьер-министрдің орынбасары Серік Жұманғариннің төрағалығымен өткен жедел штаб отырысында айтылды.
Егіс алқаптары мен жинау барысы
Ауыл шаруашылығы вице-министрі Назгүл Хатепованың айтуынша, биыл елдегі жалпы егіс алқабы 24,2 млн гектарды құрайды. Оның 15,6 млн гектарына дәнді және дәнді-бұршақты дақылдар егілген.
«Бүгінге дейін 11,3 млн гектар алқаптың өнімі жиналды. Орташа өнімділік гектарына 14,2 центнерді құрады», — дейді вице-министр.
Майлы дақылдар мен көкөніс өнімдері
Сонымен қатар 1,5 млн гектар алқаптан майлы дақылдар жиналды. Орташа өнімділік гектарына 9,7 центнер болып, 1,4 млн тонна майлы дақыл тұқымы бастырылды.
Биыл 2,7 млн тонна көкөніс, 1,9 млн тонна бақша дақылы және 1,9 млн тонна картоп жиналды.
Қаржылай қолдау
Жалпы, егін жинау қарқыны өткен жылмен бір деңгейде. Көктемгі дала жұмыстарын және егін жинау науқанын жүргізу үшін шаруаларға қажетті қаржылай қолдау көрсетілді.
Жеңілдетілген несие беру бағдарламасы аясында жалпы сомасы 664,4 млрд теңгеге 5,8 мың ауыл шаруашылығы тауарын өндіруші қаржыландырылды.