Қазақстанның 19 жасқа дейінгі футбол құрамасы Еуропа-2027 чемпионатының екінші іріктеу кезеңінде А лигасында Бельгия, Шотландия және Косово командаларымен кездеседі. Бұл туралы Qazaqyia.kz порталы Kursiv Media басылымына сілтеме жасап хабарлайды.
УЕФА штаб-пәтерінде жастар арасындағы Еуропа-2027 іріктеуінің екінші кезеңіне жеребе тарту рәсімі өтті. Қазақстан құрамасы А лигасында бельгиялықтар, шотландтар және косоварлармен кездесетін болды.
Жеребе тарту барысында А лигасындағы 28 құрама жеті топқа бөлінді. Чехия финалдық турнирдің иесі ретінде іріктеудің алғашқы екі кезеңіне қатысады, дегенмен оның негізгі кезеңге жолдамасы қамтамасыз етілген.
Әр топтың үздік үш командасы іріктеудің үшінші кезеңінде А лигасындағы орнын сақтайды. Үшінші кезеңнің жеребесі 10 желтоқсанда өтеді, ал матчтар 2027 жылдың көктемінде өтеді. Дәл осы кезеңде Чехияға қосылатын жеті құрама анықталады.
Грекияда өткен бірінші іріктеу кезеңінде қазақстандық жас футболшылар үшінші орынға ие болды. Тимур Касымовтың шәкірттері Португалиямен тең ойнап, Сербияны жеңіп, турнир иелерінен ұтылды.
Еуропа-2027 (U19) іріктеу турнирінің форматы алдыңғымен салыстырғанда бірқатар жаңалықтарды қамтиды. Барлық командалар өткен жетістіктеріне сәйкес А және В лигаларына бөлінген. Қазақстандықтар элиталық лигаға ілікті және бүгінгі жеребеде үшінші себетте болды. Егер Салоникиде гректерден ұтылмағанда, екінші немесе бірінші себетте болуы мүмкін еді.
Біздің жігіттер қатысатын мини-турнирдің өтетін орны мен күндері кейінірек анықталады.