Қазақстан сиыр етін шетелге және ЕАЭО елдеріне шығару квотасын тағы алты айға ұзартуды жоспарлап отыр. Ауыл шаруашылығы министрлігінің тиісті бұйрық жобасы 26 маусымда НҚА порталында жарияланды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Құжатқа сәйкес, алты ай ішінде шетелге және Еуразиялық экономикалық одақ елдеріне 25 мың тоннадан аспайтын сиыр етін шығаруға рұқсат етіледі. Шектеулер жаңа піскен, салқындатылған және мұздатылған етке де қатысты болады.
Ауыл шаруашылығы министрлігі квоталар отандық ет комбинаттарын шикізатпен қамтамасыз етуге, ел ішінде өңдеу көлемін арттыруға және жаңа жұмыс орындарын құруға мүмкіндік береді деп есептейді.
Тағы бір мақсат – өнімнің көбін ішкі нарықта ұстап қалу және ет бағасының күрт өсуіне жол бермеу.
«Жоба қабылданған жағдайда, ол теріс әлеуметтік-экономикалық және құқықтық салдарға әкеп соқпайды», – делінген құжатта.
Бұйрық жобасы 2026 жылғы 26 маусымда қабылданған Сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияның шешімі негізінде дайындалған.
Бұған дейін Қазақстан мал шаруашылығы одағының директоры Дәурен Салықов Қазақстан 2030 жылға қарай сиыр және қой етін экспорттаудан түсетін кірісті 4 млрд долларға дейін арттыра алатынын мәлімдеген еді.
Мәжіліс депутаты Николай Арсютин атап өткендей, мемлекет ет фермалары мен ет өңдеушілерді белсенді қолдап, олар жоғары бағамен экспортты ұлғайтуда, бұл Қазақстанда бөлшек бағалардың өсуіне әкеледі.
Сонымен қатар, Turan мал шаруашылығы қауымдастығының төрағасы Жәнібек Кенжебаевтың пікірінше, бір келі сиыр етінің құны 10-12 мың теңгеге дейін өсуі мүмкін.
Алдыңғы күні «Курсив» қазақстандықтар өз жалақысына беларусьтерге қарағанда екі есе дерлік аз ет сатып ала алатынын жазған болатын.