12 шілдеден бастап Қазақстан шетелдік өндірістегі пайдаланылған теміржол жылжымалы құрамын тіркеуге қатаң шектеулер енгізеді, деп хабарлады ROLLINGSTOCK Agency компаниясының негізін қалаушы және басқарушы серіктесі Александр Поликарпов өзінің Telegram-арнасында. Бұл туралы Qazaqyia.kz порталы Kursiv Media басылымына сілтеме жасап хабарлайды.
Сарапшының пікірінше, бұл Қазақстан нарығын, әсіресе Ресейден келетін пайдаланылған вагондардың көпшілігі үшін іс жүзінде жабады.
Шектеулер жаңа жүк вагондарына қолданылмайды.
Сонымен қатар, Қазақстан мамандандырылған жылжымалы құрамның жекелеген түрлерін, оның ішінде цемент тасығыштар, окатыш тасығыштар, думпкарлар, транспортерлер, рефрижераторлы вагондар, термос-вагондар және бірқатар мамандандырылған цистерналарды тіркеуді жалғастырады.
Сондай-ақ, Қазақстан аумағында өндірілмейтін жол техникасы үшін де ерекшелік жасалды.
Поликарповтың айтуынша, ресейлік операторлар нарықтағы вагондардың артық болуына байланысты өз паркінің бір бөлігін тартымды бағамен сатуға дайын. Алайда жаңа ережелер күшіне енгеннен кейін қазақстандық компаниялар мұндай вагондарды сатып алу мүмкіндігінен іс жүзінде айырылады.
Шектеулер 2030 жылдың соңына дейін енгізіледі. Алайда кейін олар мерзімсіз болуы мүмкін деп болжануда.
Әзірге ресейлік зауыттар Қазақстанға жаңа вагондар жеткізу мүмкіндігін сақтап отыр, бірақ жергілікті өндіріс дамыған сайын шектеулер оларға да таралуы мүмкін.
Сарапшы қорытындылай келе, жаңа ережелер Еуразиялық экономикалық одақ ішінде тауарлардың еркін қозғалысы қағидаттарына қарамастан, кезекті сауда кедергісін тудыратынын атап өтті.
Бұған дейін Курсив Қазақстанның американдық локомотивтер үшін неге 4 есе көп төлейтінін жазған болатын.