Қазақстанның энергетика министрі Ерлан Ақкенженов Украина Қарулы күштерінің Орынбор газ өңдеу зауытына шабуылына байланысты Қарашығанақтағы газ өндірісінің азайғанын хабарлады. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
«Біз Қарашығанақ кен орнындағы өндірісті 34 мың тоннадан 25 мың тоннаға дейін азайтуға мәжбүр болдық. Бұл 9 мың тоннаға қысқартуды білдіреді және біздің газ қабылдауымыз қазір азайды. Дегенмен бүкіл Қазақстанға газ жеткізу үзілген жоқ, біз қазіргі уақытта барлық газ жеткізу туралы келісімді толық көлемде орындап жатырмыз», - деді энергетика министрі.
Қарашығанақ құрамында улы күкірт бар «лас газ» өндіреді. Содан кейін ол Орынборға газ өңдеу зауытына тазарту үшін жіберіледі. Ресей оны кері жібереді, ал Қазақстан тазартылған тауарлық газды тұтынушыларға жеткізеді.