Қазақстан экономикасы Орталық Азия аймағындағы жалпы ішкі өнімнің жартысынан астамын құрайды. 2025 жылдың қорытындысы бойынша номиналды ЖІӨ $306 млрд жетіп, бұл аймақтың жиынтық көлемінің 53,7% құрады. Бұл туралы Qazaqyia.kz порталы Kursiv Media басылымына сілтеме жасап хабарлайды.
Зерттеу авторлары Қазақстан аймақтың сөзсіз экономикалық көшбасшысы болып қала беретінін атап өтеді. Салыстыру үшін, Өзбекстанның ЖІӨ $147,1 млрд, Түрікменстанның — $77,4 млрд, Қырғызстанның — $21,6 млрд, Тәжікстанның — $17,5 млрд құрады.
UNCTAD деректері бойынша, Қазақстанға $151,3 млрд жинақталған тікелей шетелдік инвестиция тиесілі — бұл Орталық Азиядағы барлық ТШИ-дің 68,6%. Аналитиктер мұны макроэкономикалық тұрақтылықпен, дамыған инфрақұрылыммен және инвестициялық климаттың дәйекті жақсаруымен байланыстырады.
Елдің тағы бір артықшылығы — дамыған қаржы жүйесі. Банк секторының активтері 2026 жылдың басында $140 млрд жетті, ал депозиттер көлемі $96,4 млрд құрады, бұл аймақтағы ең жоғары көрсеткіш болып саналады.
Зерттеу сонымен қатар Қазақстанның Қытаймен ынтымақтастықтағы рөлінің артып келе жатқанын атап көрсетеді. 2025 жылы екі ел арасындағы тауар айналымы рекордтық $48 млрд жетті. Қытай мен Еуропа арасындағы құрлықтық жүктердің 85%-дан астамы Қазақстан аумағы арқылы өтеді, бұл елді Еуразияның негізгі транзиттік торабына айналдырады.
Халықаралық валюта қорының болжамы бойынша, 2026 жылы Қазақстан экономикасы $360,4 млрд дейін өседі. Зерттеу авторларының пікірінше, елдің көшбасшылығы экономика көлемімен ғана емес, сонымен қатар оның әртараптандырылуымен, жалғасып жатқан реформалармен және ұзақ мерзімді инвестицияларды тарту қабілетімен қамтамасыз етіледі.
Айта кетейік, All China Review журналындағы мақала Қазақстан президентінің Шанхайға сапарынан кейін жарық көрді. Жасанды интеллект бойынша дүниежүзілік конференция қарсаңында Қасым-Жомарт Тоқаев қытайлық техсектор көшбасшыларымен кездесіп, қытайлық AI алыптарын Екібастұзда Data Center Valley салуға шақырды.