Ташкентте «Қытай – Орталық Азия» (C5+1) азаматтық авиация саласындағы ынтымақтастық жөніндегі жұмыс тобы конференциясы аясында Қазақстан мен Өзбекстанның авиациялық билік өкілдері екіжақты келіссөз өткізді. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Қазақстан делегациясын Көлік министрлігі Азаматтық авиация комитетінің төрағасы Салтанат Томпиева бастап барды. Өзбекстан тарапынан келіссөзге Көлік министрлігінің Әуе көлігі басқармасының басшысы Джамолиддин Назаров қатысты.
Рейстер санының артуы
Келіссөз қорытындысы бойынша Алматы – Ташкент және Астана – Ташкент бағыттарының әрқайсысы бойынша аптасына рұқсат етілген рейстер санын 60-қа дейін арттыру туралы келісімге қол жеткізілді. Бұл туралы Көлік министрлігі хабарлады.
Сондай-ақ тараптар Қазақстан мен Өзбекстан арасындағы басқа бағыттар бойынша рұқсат етілген рейстер санын аптасына 14-тен 20 рейске дейін ұлғайтуға келісті.
Жолаушылар ағынының өсуі
Қазақстан мен Өзбекстан арасындағы жолаушылар ағынының өсуі, іскерлік және туристік байланыстардың жандануы әуе тасымалына деген сұраныстың артуына ықпал етіп, екі ел арасындағы көлік қатынасын нығайтуға қосымша мүмкіндіктер ашады.
Айта кетейік, бұған дейін Қазақстан мен Пәкістан тікелей әуе қатынасын қалпына келтіруді көздеп отырғаны туралы хабарланған болатын.