Қазақстан құрамасы VI Дүниежүзілік көшпенділер ойындарында алтын медальдар санын 32-ге жеткізді. Жаңа жүлделерді спортшылар жарыстың алтыншы күнінде жеңіп алды. Бұл туралы Qazaqyia.kz порталы ҚР Туризм және спорт министрлігіне сілтеме жасап хабарлайды.
6 қыркүйекте қатысушылар көкпар, көк-бөрі, тогызқұмалақ, мангала және овари бойынша медальдарды сарапқа салды.
Зияткерлік спорт түрлерінен жарыстар Ойындардың алғашқы күнінде басталып, 6 қыркүйекте шешуші кезеңдер өтті. Қазақстандық спортшылар бірнеше пән бойынша сәтті өнер көрсетті.
«Зияткерлік спорт түрлерінен жарыстар Ойындардың бірінші күнінен басталды, ал бүгін шешуші кезеңдер өтті. Қазақстан өкілдері тогызқұмалақта жоғары нәтиже көрсетіп, төрт алтын және екі күміс медаль жеңіп алды. Қазақстандық спортшылар мангалада да сәтті өнер көрсетті. Ұлттық құрама мүшелері екі алтын, екі күміс және бір қола медаль алды. Біздің спортшылар Африка халықтарының дәстүрлі зияткерлік ойыны – овариден де жүлдесіз қалмады», – делінген хабарламада.
Тек тогызқұмалақ пен мангалада қазақстандықтар алты алтын, төрт күміс және бір қола медаль жеңіп алды.
Көк-бөріден жарыстың финалында Қазақстан Қырғызстан құрамасымен кездесті. Бұл спорт түрі Ойындарды қабылдаушы елде кең таралған және оның дәстүрлі ұлттық пәндеріне жатады.
Қырғызстан командасы шешуші матчта 12:0 есебімен жеңіске жетіп, алтын медаль алды. Қазақстан турнирді күміспен аяқтады.
Қазақстан мен Қырғызстан құрамалары көкпардан да финалдық матчта кездесті. Жарыс иелері тағы да басым түсті.
Кездесу Қырғызстанның пайдасына 7:2 есебімен аяқталды. Қазақстан командасы тағы бір күміс медаль жеңіп алды.