Қазақстан делегациясы Қытайда өткен Азияның мәдени мұрасын қорғау альянсы кеңесінің отырысына қатысты. Бұл туралы Qazaqyia.kz порталы Kursiv Media басылымына сілтеме жасап хабарлайды.
Отырыс қорытындысы бойынша Қазақстан Альянста бақылаушы мемлекет мәртебесін алды. ҚР Мәдениет және ақпарат вице-министрі Айбек Сыдықов Кеңес мүшелеріне қолдау үшін алғыс айтып, бұл мәртебенің Азия елдерімен ортақ мәдени мұраны сақтау саласындағы ынтымақтастық үшін қосымша мүмкіндіктер ашатынын атап өтті.
Сапар аясында Сыдықов Альянстың атқарушы бас хатшысы Се Бинмен де кездесті.
Тараптар одан әрі ынтымақтастық перспективаларын талқылады. Се Бин Қазақстанның Альянсқа қосылу шешімін жоғары бағалап, оны шешуші қадам деп атады және Қазақстанның ұйымға толыққанды мүше ретінде кіру мүмкіндігін қоса алғанда, өзара іс-қимылды одан әрі нығайтуға үміт білдірді.
Ол Қытай мен Қазақстанды бірегей мәдени байланыстар жалғастыратынын, олар ынтымақтастықты дәйекті дамытудың берік негізі болып табылатынын атап өтті.
Азияның мәдени мұрасын қорғау альянсы 2023 жылы Қытайдың бастамасымен құрылған. 2024 жылдан бастап ол штаб-пәтері Пекинде орналасқан үкіметаралық ұйым ретінде жұмыс істейді.