Қазақстан ауыл шаруашылығының өнімділігін арттыруға және технологиялық жаңғыртуға басымдық беріп отыр. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Ауыл шаруашылығы министрлігінің мәліметінше, басым бағыттардың бірі – жоғары табысты дақылдардың үлесін арттыру арқылы егіс алқаптарының құрылымын одан әрі әртараптандыру.
Тұқым сапасына ерекше назар
Министрлік тұқым материалының сапасына ерекше назар аударылатынын атап өтті. Биыл элиталық тұқымдардың үлесі жоспарланған 11,6%-дан асып, 12%-ға жетті. Бұл көрсеткішті одан әрі арттыру дақылдардың өнімділігі мен қолайсыз жағдайларға төзімділігін көтерудің маңызды факторларының бірі ретінде қарастырылады.
Минералды тыңайтқыштарды қолдану көлемі
Тағы бір маңызды міндет – минералды тыңайтқыштарды қолдану көлемін ұлғайту. Биыл аграршылар 2,2 млн тонна минералды тыңайтқыш енгізді. Бұл ғылыми негізделген қажеттіліктің 66%-ын құрайды. Министрлікте атап өткендей, тыңайтқыштарды қолдану көлемін одан әрі арттыру егіншілік тиімділігін көтеріп, ауыл шаруашылығы алқаптарының өнімділігін жақсартуға мүмкіндік береді.
Техниканы жаңарту және су үнемдеу
Машина-трактор паркін жаңарту жұмыстары да жалғасады. Биыл техниканы жаңарту деңгейі 7%-ға жетті, ал жыл қорытындысы бойынша бұл көрсеткішті 8%-ға жеткізу жоспарланып отыр. Сонымен қатар су үнемдеу технологияларын қолдану ауқымы кеңейтіледі.
Бұған дейін пайдаланылмаған 800 мың гектарға жуық ауыл шаруашылығы жерін игеру басталғаны хабарланған болатын.