Армения Ұлттық жиналысы Қазақстанмен дипломатиялық өкілдіктер ғимараттарын салу үшін жер телімдерін өзара беру туралы келісімді мақұлдады. Бұл туралы Qazaqyia.kz порталы Newsarmenia.am басылымына сілтеме жасап хабарлайды.
Құжатқа сәйкес, Армения Еревандағы Адмирал Исаков даңғылында орналасқан 0,33 га жер телімін Қазақстанға береді. Жер 49 жыл мерзімге символдық ақыға – жылына 1 драмға жалға беріледі.
Өз кезегінде Қазақстан Астанадағы Арганат көшесінде орналасқан дәл сондай аумақтағы жер телімін Арменияға бөледі. Жалға беру мерзімі де 49 жылды құрайды, ал жылдық төлем – бар болғаны 1 теңге.
Армения Сыртқы істер министрінің орынбасары Мнацакан Сафарянның хабарлауынша, жер телімін алушы оны өз қалауы бойынша пайдалана алмайды. Қабылдаушы тараптың жазбаша келісімінсіз мыналарға тыйым салынады:
- 01жер теліміне меншік құқығын үшінші тұлғаларға беру;
- 02жер телімін кепілге қою;
- 03жер теліміне құқықтарды басқа тәсілдермен ауыртпалық салу.
Келісім екі ел арасындағы қарым-қатынастарды нығайтуға бағытталған. Жаңа дипломатиялық өкілдіктердің құрылысы саяси диалогтың дамуына, іскерлік ынтымақтастықтың кеңеюіне және елшіліктер жұмысының тиімділігін арттыруға ықпал етеді.
Символдық құны бойынша өзара жалдаудың мұндай форматы халықаралық дипломатиялық тәжірибеде кеңінен қолданылады және дипломатиялық миссиялар объектілерінің ерекше мәртебесін көрсетеді.
Бұған дейін Курсив Армениядан келген жаңа әуе компаниясы Қазақстан нарығына шыққанын хабарлаған болатын.