Президент Қасым-Жомарт Тоқаев Тайланд Премьер-министрінің орынбасары – Сыртқы істер министрі Сихасак Пуангкеткеоны қабылдады. Бұл туралы Qazaqyia.kz порталы Kursiv Media басылымына сілтеме жасап хабарлайды.
Қонақты қарсы ала отырып, Мемлекет басшысы бұл сапардың екіжақты қарым-қатынастарды дамыту үшін маңыздылығын атап өтті.
«Қазақстан өзара ынтымақтастықты тереңдетуге мүдделі. Келесі жылы біз екі ел арасындағы дипломатиялық қарым-қатынастардың орнағанына 35 жыл толуын атап өтеміз», – деді Тоқаев.
Президент сауда-экономикалық байланыстардың қарқынды дамып келе жатқанын, оған өзара визасыз режим, туризмнің өсуі және іскерлік байланыстар ықпал етіп жатқанын атап өтті.
«Қазақстан Орталық Азиядағы Тайландтың ең ірі сауда серіктесі болып қала береді, оның үлесіне аймақпен жалпы тауар айналымының 70%-дан астамы тиесілі. Дегенмен, бізде орасан зор іске асырылмаған әлеует бар деп есептейміз», – деді ол.
Тоқаев қазақстандық нарықта 55 тай компаниясы жұмыс істеп жатқанын хабарлап, министрді сүйемелдейтін ірі бизнес-делегацияны Қазақстанның инвестициялық мүмкіндіктерін белсенді түрде зерделеуге шақырды.
«Біз сіздің еліңіздің экономикалық жетістіктеріне шынайы тәнтіміз. Бүгінде Қазақстан орта держава ретінде әлемдік аренада барған сайын маңызды рөл атқарып, Орталық Азиядағы Тайландтың негізгі серіктесі болып табылады. Біздің еліміз АСЕАН елдерімен ынтымақтастықты дамытуда байланыстырушы буын қызметін атқаруға дайын», – деп жауап берді Пуангкеткео.
Сонымен қатар, ол Тайланд Қазақстанның бірқатар халықаралық бастамаларын, оның ішінде Алматыда БҰҰ ЭСКАТО-ның Азия-Тынық мұхиты тұрақты даму цифрлық шешімдер орталығын ашу және БҰҰ құрылымында Халықаралық су ұйымын құруды қолдағанын хабарлады.