Қарағандылық Анна Рагозина есімді оқушы «Білім мұзжарғышы» экспедициясына қатысады. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
«Білім мұзжарғышы» жобасы «Росатомның» қолдауымен жетінші рет ұйымдастырылып отыр, деп хабарлады Орталық Азиядағы мемлекеттік корпорация арнасы.
«Бала кезімнен бастап ғылым мен жаңалықтардан шабыт алдым, сондықтан Арктикаға барып, ядролық технология туралы білу мүмкіндігі мен үшін ерекше болды. Мен білім мен технология арқылы әлемді жақсы жаққа өзгертуге ұмтылатын адамдарды біріктіретін жобада Қазақстанды таныстырғаныма мақтанамын», - деді Анна Рагозина.
Биыл экспедицияға қатысуға 21 елден шамамен 5 мың оқушы өтініш берді. Қазақстан экспедицияға қатысуға 945 өтінім беріп, көш бастады. Бұл – рекордтық көрсеткіш. Іріктеуден 22 жасөспірім өтті – әр қатысушы елден бір өкіл.
«Білім мұзжарғышы» ғылыми және ақпараттық-түсіндіру жобасы «Росатом» мемлекеттік корпорациясының қолдауымен ұйымдастырылып отыр. Ол жаратылыстану ғылымдары мен атом өнеркәсібі технологияларын кеңінен насихаттауға, дарынды балаларды анықтауға және қолдауға, олардың қабілеттерін дамытуға және кәсіптік бағдар беруге бағытталған.
Жобаның алты маусымында «Росатомның» Солтүстік полюстегі арктикалық экспедицияларына әлем елдерінен 400-ден астам дарынды мектеп оқушылары қатысқан.