«Қайрат» футбол клубының бас бапкерінің міндетін атқарушы Жора Арутюнян итальяндық «Аталантаға» қарсы Конференциялар лигасының матчында жеңіске жетуді мақсат етіп отырғанын мәлімдеді. Жалпы кезеңнің үшінші турындағы кездесу 5 қарашада Бергамода өтеді. Бұл туралы Qazaqyia.kz порталы Kursiv Media басылымына сілтеме жасап хабарлайды.
Арутюнянның айтуынша, «Қайраттың» барлық футболшылары ойынға дайын және көңіл-күйлері жақсы. Сонымен қатар бапкер «Аталантаны» Чемпиондар лигасы деңгейіндегі қарсыластармен бір қатарға қойды.
«Бұл жерде болу өте толқытады. Барлық жігіттер сау, қатарда, көңіл-күйлері жақсы – ертең футболшылар 100% күш салады. Бір жыл бұрын мұндай болады деп ешкім болжаған жоқ. «Аталанта» – Чемпиондар лигасы деңгейіндегі клуб. Біз талдаған матчтарға қарағанда, бұл команда біз былтыр жақсы ойын өткізген «Интерден» кем емес», – деп келтіреді Арутюнянның сөзін ASnews.kz.
Дәл бір жыл бұрын, 2025 жылдың 5 қарашасында «Қайрат» Италияда Чемпиондар лигасының жалпы кезеңінде «Интермен» кездескен болатын. Алматылықтар «Сан-Сиро» стадионында 1:2 есебімен жеңіліп қалған. Енді қазақстандық клуб Бергамода 2024 жылғы Еуропа лигасының жеңімпазына қарсы ойнайды.
Арутюнян команда Маурицио Сарри басқаратын «Аталантаның» ойынын талдағанын және бас бапкер ауысқаннан кейін өз жүйесін түбегейлі өзгертуді жоспарлап отырмағанын атап өтті.
«Менде толқу жоқ. Бұрынғыдай қарсыласқа дайындалып жатырмыз. Маурицио Сарридің өзіндік стилі бар, ертең оған қарсы тұруға тырысамыз. Өзгерістерге келетін болсақ: бізде «Алтайға» дейін үш жаттығу, «Аталантаға» дейін үш жаттығу болды. Түбегейлі ештеңе өзгертудің қажеті болмады, өйткені клубта вертикаль құрылған және команда плюс-минус бір жүйеде ойнайды. Контрпрессинг тұрғысынан біз тек өз көзқарасымызды қосқымыз келеді», – деді ол.
«Қайратпен» кездесу алдында итальяндық маман алдағы матчты қиын деп атап, алматылықтардың былтырғы еуропалық топ-клубтарға қарсы ойындарын еске салды.
Арутюнян «Қайраттың» басты мақсаты ретінде еурокубоктердегі алғашқы жеңісті атады.
«Біз ойыннан ойынға қарай жылжып келеміз және барлық қарсыластардың деңгейін түсінеміз. Жігіттермен Қазақстан үшін еурокубоктерде тарихи жеңіске жеткіміз келетіні туралы сөйлестік және оны жасауға тырысамыз. Қалай болатынын әзірге білмейміз, бірақ белгілі бір жоспар бар», – деді бапкер.
Конференциялар лигасының жалпы кезеңінің екі турынан кейін «Қайрат» бір ұпай жинады. Алматылықтар «Ригамен» 1:1 есебімен тең ойнады, содан кейін өз алаңында «Панатинаикоске» 1:5 есебімен ірі жеңіліс тапты. «Аталанта» «Пафосты» 3:1 есебімен жеңіп бастады, содан кейін «Аякске» 0:2 есебімен жеңілді.
Арутюнян сондай-ақ «Қайраттың» бұрынғы бас бапкері Рафаэль Уразбахтиннің қосқан үлесін жеке атап өтті.
«Рафаэль Радикович Уразбахтиннің қосқан үлесін бәрі көріп, ұзақ есте сақтайды: екі чемпиондық, Чемпиондар лигасы, Конференциялар лигасы. Ол біздің елдегі жалғыз осындай бапкер, біз оған теңелуіміз керек. «Алтаймен» ойын алдында ол кеңес беріп, сәттілік тіледі», – деді Арутюнян.
Арутюнян басқарған алғашқы матчта «Қайрат» «Алтаймен» 1:1 есебімен тең ойнап, ҚПЛ-2026-да екінші орынмен мәреге жетті.
«Аталанта» – «Қайрат» матчы 5 қарашада Бергамода өтеді және Астана уақытымен 22:45-те басталады.