23 маусымда өткен «Ауыл» партиясының кезектен тыс съезінде Қайрат Айтуғанов партия төрағасы болып сайланды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Съезде партияның алдағы міндеттері, сондай-ақ Қазақстанның жаңа Конституциясына сәйкес жарғыға өзгерістер мен толықтырулар енгізу мәселелері қаралды.
Жиын барысында Серік Егізбаев «Ауыл» партиясы төрағасының өкілеттігін тапсыратынын мәлімдеді. Ол бұл шешімді партияның мүддесі мен одан әрі дамуы үшін қабылдағанын атап өтті.
«Бүгінгі саяси сәт барлық прогрессивті күштерден конституциялық реформа барысында расталған қоғамның жаңару сұранысына лайықты жауап беруді талап етеді. «Ауыл» бұл процестерден шетте қала алмайды, керісінше, партия олардың белсенді қатысушысы болып табылады, ал ол үшін аграрлық және әлеуметтік күн тәртібіне жаңа тәсілдер енгізу, жаңартылған саяси жүйеде тиімді жұмыс істеу қажет», — деді Егізбаев.
Оның айтуынша, партия төрағасының өкілеттігін тапсыру туралы шешім — партияның ішкі динамикаға дайындығын және жаңа саяси жүйедегі алдағы сайлауларға толыққанды қатысу ниетін көрсететін заңды қадам.
Егізбаев партия мақсаттарына адалдығын, жаңа төрағаны қолдауға дайын екенін, сондай-ақ партия қатарында белсенді қызметін жалғастыруға ниетті екенін жеткізді.
Ол съезд делегаттарына партия төрағасының орынбасары Қайрат Айтуғановтың кандидатурасын төрағалық қызметке ұсынды.
Қайрат Айтуғановтың аграрлық экономика, мемлекеттік қызмет және ғылым саласында 40 жылдан астам тәжірибесі бар. Ол әр жылдары ҚР Ауыл шаруашылығы бірінші вице-министрі, Халықаралық қайта құру және даму банкінің аппарат басшысы және жоба жетекшісі, «Оңтүстік» ӘКК» АҚ басқарма төрағасы, Қарағанды облысы әкімінің орынбасары, «ҚазАгро» ҰБХ» АҚ басқарма төрағасының орынбасары, сондай-ақ «ҚР Кәсіподақтар федерациясы» республикалық қоғамдық бірлестігі төрағасының орынбасары қызметтерін атқарған.
Сонымен қатар, ол «Ұлттық аграрлық ғылыми-білім беру орталығы» КЕАҚ директорлар кеңесінің төрағасы және С. Сейфуллин атындағы Қазақ агротехникалық университетінің басқарма төрағасы болған.
Партия төрағасының орынбасары қызметінде Айтуғанов ауылдық аумақтарды дамытуға байланысты заңнамалық және бағдарламалық бастамаларды әзірлеу мен ілгерілетуге қатысқан.
Егізбаевтың айтуынша, жаңа төраға партия жұмысында сабақтастықты қамтамасыз ету және «Ауыл» алдында тұрған міндеттерді үйлестіру үшін әлеуетке ие.
Съезд делегаттары Қайрат Айтуғановты партия төрағасы етіп сайлауды бірауыздан қолдады.
Сондай-ақ съезд партия жарғысына жаңа Конституцияға сәйкес өзгерістер мен толықтырулар енгізу туралы шешім қабылдады.
Бұған дейін «Курсив» Қазақстанның бұрынғы президенттікке үміткері Төлеутай Рахимбековтің «Ауыл» партиясынан шыққанын хабарлаған болатын.