Польшаның ең ірі оппозициялық партиясы «Заң және әділет» үкіметтің Украинаға қосымша Patriot зымырандарын беру жоспарына наразылық білдірді. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Ұлттық қорғаныс министрінің орынбасары Магдалена Собковяк-Чернецкая RMF FM радиосына берген сұхбатында Польша алдағы күндері Украинаға Patriot зымырандарын беру туралы шешім қабылдауы мүмкін екенін мәлімдеді.
Депутат Пшемыслав Чарнек әлеуметтік желідегі парақшасында: «Patriot зымырандары шетелдік көмек қоймасы емес. Олар Польша қорғанысының ең маңызды элементтерінің бірі. Бірде-бір зымыран Польшадан тыс шығарылмауы керек», - деп жазды.
Бұған дейін ұлтшыл «Конфедерация» коалициясынан шыққан Польша Сеймінің вице-спикері Кшиштоф Босак Польша Украинаға Варшава әуе қорғаныс жүйесі үшін сатып алған Patriot зымырандарын бергенін мәлімдеген болатын.
Польша президенті кеңсесінің Халықаралық саясат бюросының басшысы Марчин Пшидач Польша бұған дейін АҚШ-тан Украинаға Patriot зымырандарын сатып алу кезегін бергенін мәлімдеді.
Ресей Украинаға қару-жарақ жеткізу қақтығысты реттеуге кедергі келтіреді, НАТО елдерін қақтығысқа тікелей тартады деп санайды. Ресей сыртқы істер министрі Сергей Лавров Украинаға арналған қару-жарақ бар кез келген жөнелтілім Ресей үшін заңды нысана болатынын мәлімдеді.