Петропавлда СОБР қызметкерлері кемінде 1,1 млн теңгенің алаяқтарға аударылуын болдырмады. 57 жастағы қала тұрғыны бұл қаражатты криптовалютаға салым ретінде жібермек болған. Бұл туралы Qazaqyia.kz порталы Kursiv Media басылымына сілтеме жасап хабарлайды.
Солтүстік Қазақстан облысы полиция департаментінің жедел әрекет ету арнайы жасағының қызметкерлері Қарасай Ботпаев пен Бауыржан Ахмет «Рахмет» сауда үйінде кезекшілікте болған. Ботпаев банкоматтың жанында қолында ақша шоғыры бар, телефонмен мазасыз сөйлесіп тұрған ер адамды байқаған.
Полицей өзін таныстырып, қызметтік куәлігін көрсеткен, алайда ер адам оған бірден сенбеген. Сонда Ботпаев нысандағы әріптесін шақырған. Осыдан кейін қала тұрғыны полицейлерді тыңдай бастаған.
Ер адам Binance платформасында криптовалютамен сауда жасайтынын айтқан, бірақ бұл қандай платформа екенін түсіндіре алмаған. Ол интернетте табыс табу туралы хабарландыруды көріп, Telegram-да көрсетілген байланысқа жазғаны анықталған. Әңгімелесушілер оған криптовалютадан табыс табуды ұсынып, салымдардың болжамды кірістілігінің графиктерін жіберіп отырған.
Полицияның мәліметінше, бұл адамдардың нақты криптовалюта биржасына қатысы болмаған. Ер адам оларға ақша аударуға дайын болған, бірақ СОБР қызметкерлері оны тоқтатқан. Зиян келтірілмеген.
Өңірдегі сауда үйлерінде мұндай кезекшіліктер тұрақты түрде өтеді — сағат 9:00-ден жабылғанға дейін. Бір қызметкер нысанда қоғамдық тәртіпті қадағалайды, екіншісі азаматтық киіммен жұмыс істеп, интернет-алаяқтықтың алдын алумен айналысады.
Полиция жеңіл табыс уәделеріне сенбеуге және адам өзі түсінбейтін құралдарға, әсіресе бейтаныс адамдардың нұсқауымен ақша салмауға шақырды.
Сондай-ақ ведомство туыстар атынан бейнеқоңыраулар туралы ескертті. Ботпаевтың тәжірибесінде алаяқтар адамдар интернетте жариялаған фотосуреттерді пайдаланып, нейрожелілер арқылы сыртқы келбетін ауыстырған жағдайлар болған.
Егер бейнеқоңырау кезінде жақын адам ақша аударуды сұраса, полицейлер оның жеке басын тексеруді ұсынады: бөгде адамдар білмейтін сұрақтар қою керек. Қаржыға қатысты кез келген мәліметті ресми арналар арқылы тексеру қажет. Алаяқтық белгілері байқалса, дереу полицияға жүгіну керек.
Бұған дейін «Курсив» Мұғалімдер күні қарсаңында алаяқтар қазақстандықтарды педагогтерге арналған сыйлық жинақтарын ұсынып, фишингтік сайттарға тартып жатқанын жазған. Бас прокуратураның Құқықтық статистика комитетінің мәліметінше, олар алдау үшін ЖИ көмегімен жасалған жоқ тауарлардың суреттерін және сатушыларды имитациялайтын чат-боттарды пайдаланады.