Павлодар облысының тұрғыны Дженнифер Лопес концертіне сатып алған билетінің толық құнын сот арқылы қайтарып алды. Сатушы билеттің толық құнын қайтарудан бас тартқан, бірақ апелляциялық сот сатып алушының пайдасына шешім шығарды. Бұл туралы Qazaqyia.kz порталы Kursiv Media басылымына сілтеме жасап хабарлайды.

Қазақстандық тұрғынға әділеттілікті қалпына келтіруге Павлодар облысының сауда және тұтынушылардың құқықтарын қорғау департаментінің мамандары көмектесті.

Іс материалдарына сәйкес, билет туристік агенттік арқылы сатып алынған. Алайда төлемнен кейін сатып алушыға келісімшарт, кассалық чек немесе билеттің өзі берілмеген. Кейін ол сатып алудан бас тартып, ақшаны қайтаруды талап еткен. Орындаушы тек соманың бір бөлігін қайтаруға келісіп, 30% - 113 061 теңгені ұстап қалған.

Бірінші сатыдағы сот орындаушыны ақшаның бір бөлігін ғана қайтаруға міндеттеп, дауды туристік қызметтерге қатысты деп санаған.

«Бірінші сатыдағы сотта орындаушы дау туристік қызметтерді көрсету аясында туындағанын, өйткені билет туристік агенттік арқылы сатып алынғанын, және Қазақстан Республикасының «Туристік қызмет туралы» Заңының ережелерін қолдануды сұрады. Сот бұл ұстаныммен келісіп, талапты ішінара қанағаттандырып, тұтынушының пайдасына 263 809 теңге өндіріп, ұсталған 113 060 теңге сомасын өндіруден бас тартты», — деп түсіндірді департаментте.

Алайда апелляциялық сатыдағы сот тараптар арасында туристік өнімге келісімшарт жасалмағанын, тек концертке билет сатып алу туралы болғанын анықтады.

«Тараптар арасындағы құқықтық қатынастар Қазақстан Республикасы Азаматтық кодексінің 33-тарауының ақылы қызмет көрсету туралы нормаларымен реттеледі, «Туристік қызмет туралы» Заңымен емес», — делінген сот шешімінде.

Сонымен қатар, орындаушы 113 мың теңгеден астам соманы ұстап қалуға мүмкіндік беретін шығындарды құжаттармен растай алмаған.

«Қызмет құнының 30% ұстап қалу шарттары тұтынушыға төлем жасалғаннан кейін ғана жеткізілген, сондықтан олар тараптармен келісілген деп саналмайды», — деп атап өтті сот.

Нәтижесінде апелляциялық алқа орындаушыны сатып алушыға билеттің толық құнын — 376 869 теңгені, сондай-ақ сот шығындарын өтеуге міндеттеді.

Сауда және тұтынушылардың құқықтарын қорғау департаменті сатып алу алдында сатушы билеттерді сатып алу және қайтару шарттары туралы толық ақпарат беруге міндетті екенін еске салды. Сатып алушыларға ресми билет операторларының қызметтерін пайдалануға, чектерді, түбіртектерді, электронды билеттерді және хат-хабарларды сақтауға кеңес беріледі — олар құқықтарын қорғау кезінде қажет болуы мүмкін.

Еске салайық, Дженнифер Лопес Астанада 2025 жылғы 1 тамызда, ал Алматыда 10 тамызда өнер көрсеткен. Бұған дейін «Курсив» Джей Ло концерттерінің Қазақстан экономикасына әсерін Ұлттық банктің қалай бағалағаны туралы айтқан болатын.