Павлодар облысында студенттер мен оқушылардан ақша бопсалағандар ұсталды. Бұл туралы Qazaqyia.kz порталы Sputnik Қазақстан басылымына сілтеме жасап хабарлайды.
Екібастұз қаласында колледждің кәмелетке толмаған студенті танысымен бірге жәбірленушіні автокөлікпен алып кетіп, оған қарсы күш қолданған. Олар 50 мың теңге бопсалады деген күдікпен ұсталды.
Павлодар қаласында екі оқушы өз қатарластарынан бағалы заттарды ломбардқа өткізіп, түскен ақшаны беруді талап еткен. Кейбір жәбірленушілерге қысым көрсету үшін әшкерелейтін бейнематериалдар да пайдаланылған.
Облыстық ұйымдасқан қылмысқа қарсы басқарма бастығы Ғабит Қабдрахмановтың айтуынша, аталған екі дерек бойынша қылмыстық істер қозғалды. Күдіктілер ақша беру кезінде ұсталды. Құқық қорғау органдары өзге де ықтимал қатысушыларды анықтау жұмыстарын жалғастыруда, сондай-ақ қосымша эпизодтардың бар-жоғы тексерілуде.
Тәртіп сақшылары жастар арасында қылмыстық топтар құру, қылмыстық ықпал орнату және ақша бопсалау әрекеттері заңмен қатаң жазаланатынын ескертті.