Павлодар облысындағы «Aqtogai Milk» ЖШС сүт фермасының канализациялық құдығында жұмыс істеп жатқан алты қызметкер қайтыс болды, бір адам ауруханаға жатқызылды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Әлеуметтік желілерде сүт фермасының алты қызметкері канализациялық құдықта жұмыс кезінде қаза тапқаны туралы ақпарат тарады. Бұл ақпаратты Павлодар облысы полиция департаменті «Курсивке» растады.
Әлеуметтік желілердегі мәліметтерге сәйкес, оқиға орнында дәрігерлер 1963, 1975, 1983, 1998, 2006 және 2008 жылдары туған ер адамдардың өлімін растады. Тірі қалған жалғыз адам – 38 жастағы ер адам. Ол көмірқышқыл газымен улану диагнозымен ауруханаға жатқызылды.
Алдын ала мәліметтер бойынша, жұмысшылар канализациялық құдықта орнатылған электр сорғысындағы ақауларды жоюмен айналысқан.
Осы факті бойынша полиция қылмыстық іс қозғады.
«Қазақстан Республикасы Қылмыстық іс жүргізу кодексінің 201-бабына сәйкес, өзге ақпарат жария етуге жатпайды», – деп түйіндеді полиция.
Өткен аптада одан кем емес қорқынышты оқиға болды: елордалық қонақүйлердің бірінде әйел бала туып, оны канализацияға тастап кеткен. Әлеуметтік желілердегі мәліметтерге сәйкес, анада жүктіліктің алтыншы айында мерзімінен бұрын босану болған. Полиция баланың канализациядан табылуы фактісі бойынша сотқа дейінгі тергеу жүргізіліп жатқанын хабарлады.
Бұған дейін «Курсив» Солтүстік Қазақстан облысында канализацияны жөндеу кезінде екі жұмысшының қаза тапқанын жазған болатын.