Парижде жергілікті коменданттық сағат енгізілді: 22:00-ден 06:00-ге дейін сыртқа шығуға шектеу қойылды. Бұл шаралар 2026 жылғы 19 қазан, дүйсенбі кешінен бастап күшіне енді. Шектеулер III, X және XI округтердің шекарасында орналасқан Республика алаңына, сондай-ақ тарихи I округтегі Ле-Аль кварталындағы бірнеше көшеге қатысты. Бұл туралы Qazaqyia.kz порталы Kursiv Media басылымына сілтеме жасап хабарлайды.
Франция премьер-министрі Себастьен Лекорню префекттерге тонаушылыққа қарсы күрес үшін басқа қалаларда да осындай «өте шектеулі» шараларды енгізуді тапсырды. Коменданттық сағат (20:00-ден 06:00-ге дейін) елдің солтүстігіндегі төрт қалада — Лилль, Ваттиньи, Дуэ және Дененде — екі тәулікке енгізілді.
21 қыркүйекте мектептердегі мәселелерге байланысты басталған жаппай наразылықтар мен погромдар кейіннен студенттер, кәсіподақтар мен фермерлердің қатысуымен жалпы бүліншілікке ұласты. Олар бағаның өсуіне қарсы шықты. Ел бойынша акцияларға шамамен 550 мың адам қатысып, 2 мыңнан астам адам ұсталды.
Тәртіпсіздіктер аясында онлайн алаңдарда жаппай наразылықтар кезінде ұрланған болуы мүмкін тауарларды сату туралы хабарландырулар пайда бола бастады. Vinted платформасы мұндай жарияланымдарды анықтап, жоюды бастады.
«Өткен демалыс күндері біздің команда ұрланған мүлікке қатысты болуы мүмкін хабарландыруларды анықтап, жоюға кірісті, сондай-ақ күдікті жарияланымдарды бақылауды күшейттік», – деді компания өкілдері BFMTV телеарнасына.
Бұған дейін «Курсив» жазғандай, Франция президенті Эмманюэль Макрон 2026 жылғы 18 қазан кешінде ұлтқа арнаған шұғыл үндеуінде үкіметтен ел бойынша өршіген жаппай тәртіпсіздіктердің қайталануына жол бермеу үшін қатаң шаралар қабылдауды талап етті. Ол үкіметті арнайы қызметтердің барлау деректерін жинау және осындай оқиғаларды болжау жұмысынан сабақ алуға шақырды.