Пәкістанның Пенджаб провинциясында полиция қызметкерлерінің оқ жаудыруы салдарынан тоғыз жасар австралиялық қыз қаза тауып, оның отбасының екі мүшесі жарақат алды. Бұл туралы Qazaqyia.kz порталы The Guardian басылымына сілтеме жасап хабарлайды.
Оқиға сәрсенбі күні жергілікті уақыт бойынша түнде болды. Перт қаласының Кьюдейл ауданынан келген отбасы Чакуал қаласындағы туыстарына бара жатқан. Олар жалға алынған көлікте келе жатып, тонауға ұшыраған. Пәкістандық ағылшын тіліндегі Dawn басылымының хабарлауынша, екі қарақшы мотоциклмен келіп, біреуінің қолында тапанша болған. Оларды полиция қызметкері байқап қалғанда, қарақшылар қашып кеткен, ал жалға алынған көлік те жүріп кеткен.
Полиция қызметкері жергілікті БАҚ-қа берген сұхбатында: «Полиция қызметкерлері көліктің кенеттен жүріп кеткенін көріп, оны қарақшылардікі деп ойлап, көлікке оқ жаудырды», – деді.
Отбасы ауруханаға жеткізілді, онда тоғыз жасар қыздың қазасы расталды. Оның әкесі мен ағасы ауыр жарақат алды, ал анасы зардап шеккен жоқ. Австралия Сыртқы істер және сауда департаменті қаза тапқан австралиялықтың отбасына және жарақат алған екі австралиялыққа консулдық көмек көрсетіп жатқанын растады. Департамент өкілі мәлімдемесінде: «Біз отбасына қиын сәтте шын жүректен көңіл айтамыз», – деді.
Батыс Австралиядағы Пәкістан қауымдастығының бас хатшысы Асим Чаудри бұл оқиға жергілікті қауымдастыққа қатты әсер еткенін айтты. Ол Nine News-ке берген сұхбатында: «Бұл жаңалық өте шошыңды, әсіресе тоғыз жасар қыздың өлімі. Олар Меккеге қажылықтан жаңа ғана оралған еді», – деді.