Газ өңдеу зауыты орналасқан Орынборға жасалған шабуыл Қазақстанға газ жеткізуге әсер еткен жоқ, деп хабарлады Қазақстан энергетика министрлігі. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
"Логистика реттелді, ал қарсы газ көлемін жеткізу балама жол арқылы жүзеге асырылып жатыр. Отын көлемі басқа көздердің есебінен үздіксіз толықтырылып жатыр. Қазақстанның газ инфрақұрылымы қалыпты жұмыс істеп тұр", - делінген мәлімдемеде.
Министрлік ішкі нарық энергия ресурстарымен толық қамтамасыз етілгенін хабарлады.
24 маусымда Орынбор облысының губернаторы Евгений Солнцев Украина Қарулы күштері аймаққа жаппай шабуыл жасағанын хабарлады. "Облыс орталығындағы өнеркәсіптік нысанның үстінде бірнеше ұшқышсыз ұшу аппараттары атып түсірілді. Төтенше жағдайлар қызметі оқиға орнында жұмыс істеп жатыр. Зардап шеккендер жоқ", - деп жазды Солнцев өзінің Max парақшасында.