Орегон штатының Форест-Гроув қаласындағы ауылдық үйде болған бес адамның өліміне байланысты құрбандардың есімдері анықталды. Бұл туралы Qazaqyia.kz порталы Associated Press басылымына сілтеме жасап хабарлайды.
Құрбандардың арасында күдіктінің қызы, оның анасы, әжесі және екі досы бар. Бұл туралы дүйсенбі күні билік өкілдері мәлімдеді.
Күдікті, 36 жастағы Бенджамин Чарльз Паркер, Вашингтон штатының Энумкло қаласында өз көлігінде өлі күйінде табылды. Бұл жер Форест-Гроувтан шамамен 187 миль (301 шақырым) солтүстікте орналасқан. Полиция Паркер өз-өзіне қол жұмсады деп есептейді.
Вашингтон округінің шериф кеңсесі құрбандардың арасында Паркердің қызы, 26 жастағы Стелла Джейд Кимси; оның 60 жастағы анасы Роуэн Карла Кимси; және 85 жастағы әжесі Мэри Элизабет Кимси бар екенін хабарлады.
Стелла Кимсидің ең жақын досы, 26 жастағы Линси Мэй Харальдсен және Харальдсеннің серіктесі, 27 жастағы Элвин Рэймонд Чу да қаза тапқандар арасында.
Билік өкілдері Роуэн Кимси Портлендтен шамамен 30 миль батыста орналасқан жердің иесі болғанын және ол жерде қызы Стелламен және Паркермен бірге тұрғанын айтты.
Оқиға орнынан екі мысық пен екі ит те өлі күйінде табылды. Тағы бір мысық емдеуге жеткізілді, бірақ жарақаттары ауыр болғандықтан кейін эвтаназия жасалды.
Шериф кеңсесі адамдар мен жануарлардың қалай қайтыс болғанын нақты айтпады.
Билік бес мәйітті сенбі күні тауып, жексенбі күні өлімді тергеу туралы хабарлады. Олар тергеудің күрделілігін және қылмыс орнының үлкендігін атап өтті.
«Мен 22 жылдық тәжірибемде осындай күрделі тергеуді көрген емеспін», — деді шериф Кэприс Мэсси.