Оралда ер адам киімінсіз тұрғын үйдің газ құбырына шыққаны үшін 20 тәулікке қамауға алынды. Медициналық куәландыру оның есірткілік масаң күйде болғанын растады. Бұл туралы Qazaqyia.kz порталы Kursiv Media басылымына сілтеме жасап хабарлайды.
Бұл ақпаратты Батыс Қазақстан облыстық сотының баспасөз қызметі мәлімдеді.
Оқиға қалай болды
Оқиға Кунаев көшесінде болған. Тұрғындар үй маңында жалаңаш ер адамды байқап, полиция шақырған. Келген қызметкерлер оны бірінші және екінші қабат аралығындағы газ құбырынан тапқан.
Полицейлер оған түсуге талап қойған, алайда ер адам бағынбай, былапыт сөздер айтқан. Медициналық куәландыру қорытындысы бойынша, ол каннабиноидтар мен опиоидтардың әсерінде болған.
Сот шешімі
Сотта ер адам кінәсін толық мойындады, бірақ өз мінез-құлқының себептерін түсіндіре алмады. Ол қоғамдық тәртіпті бұзу және есірткілік масаң күйде болуға байланысты құқық бұзушылық жасағаны үшін кінәлі деп танылды.
20 тәулік әкімшілік қамаудан басқа, сот оның мінез-құлқына алты айға ерекше талаптар белгіледі. Осы мерзімге оған алкоголь, есірткі құралдары мен психотроптық заттарды қолдануға тыйым салынды.
Сот қаулысы әлі заңды күшіне енген жоқ.