Қазақстанның оңтүстік өңірлерінде су шаруашылығы инфрақұрылымын кешенді жаңғырту аясында 103 ирригация каналын автоматтандыру жұмыстары басталды. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Су ресурстары және ирригация министрлігінің мәліметінше, бұл каналдардың жалпы ұзындығы 857 шақырымды құрайды және 65 мың гектар суармалы алқапты қамтиды. Сонымен қатар, бұған дейін реконструкциядан өткен жалпы ұзындығы 1 184 шақырым болатын 270 каналды автоматтандыру жұмыстары жүргізіліп жатыр.
Бұдан бөлек, суару каналдарын автоматтандыру элементтерімен және суды есепке алудың заманауи жүйелерін енгізе отырып, реконструкциялауға арналған 264 жоба әзірленіп жатыр.
Цифрлық құралдарды енгізудің маңызы
Вице-министр Аслан Абдраимовтың айтуынша, цифрлық құралдарды енгізу су ресурстарын басқарудың кешенді әрі көпдеңгейлі жүйесін жоспарлы түрде қалыптастыруға мүмкіндік береді. Бұл экономиканың түрлі салаларының тұрақты дамуын қамтамасыз етуге, елдің су қауіпсіздігіне кепілдік беруге және ресурстарды болашақ ұрпақ үшін сақтауға мүмкіндік береді.
Су ресурстарының ұлттық ақпараттық жүйесі
Министрлік Су ресурстарының ұлттық ақпараттық жүйесін әзірледі. Қазіргі таңда жүйеде 23 мыңнан астам су нысанының деректері цифрландырылып, құрылымдалды. Олардың қатарында 17 758 өзен, 3 148 көл және 1 207 гидротехникалық нысан бар.