АҚШ-тың Огайо штатындағы Сиото өзенінде бір адамды құтқаруға тырысқан бес адам суға батып қайтыс болды. Бұл туралы Qazaqyia.kz порталы The Guardian басылымына сілтеме жасап хабарлайды.
Делвер округінің шерифі Джеффри Балзер дүйсенбі күнгі баспасөз мәслихатында бір топ адам өзенге шомылуға кірген бір адамды құтқаруға тырысқан кезде қайғылы оқиға болғанын айтты. Оқиға Колумбус қаласының маңындағы Пауэлл қалашығында болған.
Бір жүргізуші 911-ге қоңырау шалып, топпен бірге болған қорқып кеткен баланы көргенін хабарлаған. Бала жақын маңдағы жолда жүгіріп бара жатқан. Шериф Балзердің айтуынша, 10 жасқа дейінгі екі бала отбасылық қызметтердің қарауына берілген, оның ішінде көмек сұрап жүгірген бала да бар.
Топ жексенбі күні Сиото өзенінің жағасында жиналған. Олардың біреуі жүзу үшін суға түскен. «Міне, сол кезде трагедия басталды», - деді Балзер. Оған көмектесуге секірген басқалар да суға бата бастаған.
Құтқарушылар жексенбі күні судан екі әйелді тауып, олар ауруханада қайтыс болды. Делвер округі шерифінің өкілі Трейси Уайттың айтуынша, үш ер адамның денесі дүйсенбі күні өзеннен табылған.
Бұл оқиға Ютаның оңтүстігінде тасқын салдарынан бес адам қаза тапқаннан екі күн өткен соң болды.