Өзбекстан Қырғызстан арқылы Еуразиялық экономикалық одақ (ЕАЭО) нарығына шығу үшін көрші елмен бірлескен фармацевтикалық өндірістер құруды жоспарлап отыр. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Қырғыз-өзбек бизнес-форумында сөйлеген Өзбекстанның инвестициялар, өнеркәсіп және сауда министрі Лазиз Кудратов бірлескен кәсіпорындар құру арқылы ЕАЭО нарығына шығу мүмкіндігін атап өтті. Ол Өзбекстан ЕАЭО мүшесі болмаса да, Қырғызстанмен өндірістік кооперация жаңа мүмкіндіктер ашатынын айтты.
Кудратовтың сөзінше, Қырғызстан жыл сайын 2 миллиард АҚШ долларынан астам сомаға фармацевтикалық өнім импорттайды. Оңтүстік Азия елдеріндегі сұраныс көлемі шамамен 65 миллиард долларды құраса, ЕАЭО нарығының көлемі 30 миллиард долларға жетеді.
Министр электр техникасы өнеркәсібін де перспективалы бағыт ретінде атады. Қырғызстан мен Өзбекстанда мыс, алюминий және басқа да шикізат қоры мол болғандықтан, трансформаторлар, электр қозғалтқыштары, кабель-өткізгіш өнімдері және өзге де электр техникаларын бірлесіп өндіруге болады. Соңғы үш жылда Өзбекстан электр техникалық өнімдерінің экспортын әлемнің 162 еліне дейін кеңейткен.
Сонымен қатар, ауыл шаруашылығы, тоқыма өнеркәсібі және мал шаруашылығы салаларында ынтымақтастықты кеңейту ұсынылды. Қараша айында Ыстықкөл облысында картопты өнеркәсіптік негізде өсіру жобасын бастау, ал қазанда Шу облысында көшет өсіруге арналған «Достық бағы» жобасын іске асыру жоспарланып отыр. Өзбекстан жүн мен теріні өңдеу және тоқыма өнімдерін бірлесіп өндіру бағытында да ынтымақтастықты дамытуға мүдделі.