Өскеменде мемлекеттік бағдарлама арқылы баспана алуға көмектесемін деп уәде берген алаяқтық схема әшкереленді. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Polisia.kz-тің хабарлауынша, 30 жастағы ер адам азаматтарға пәтерлерді тиімді бағамен ұсынып, оларды рәсімдеу жұмыстарын өз мойнына алатынын айтқан. Ол 2024 жылдың қарашасынан 2026 жылдың сәуіріне дейін әрекет еткен.
Алаяқ адамдарды өзіне қолма-қол ақша беруге және банк шоттарына ақша аударуға көндірген. Ақша алғаннан кейін тұрғын үйді тіркеу, құжаттарды рәсімдеу және басқа да төлемдер үшін қосымша шығындар қажет екенін айтып, жаңа талаптар қойған.
Жәбірленушілерді мәміленің шынайылығына түпкілікті сендіру үшін ер адам пәтер жалдап, оны олардың болашақ баспанасы ретінде көрсеткен. Азаматтар жақын арада баспананың кілтін аламыз деген үмітпен ақша беруді жалғастырған.
Алайда уәде етілген баспана мен құжаттарды олар сол күйі ала алмаған. Алаяқтың әрекетінен облыстың 25 тұрғыны зардап шеккен. Келтірілген жалпы шығын көлемі 186 млн теңгеден асады.
Күдікті ұсталып, полицияға жеткізілді. Қазіргі уақытта ол уақытша ұстау изоляторында және жауап алу барысында өз кінәсін мойындады.