Нигер астанасы Ниамейде жексенбі күні тыныштық орнап, қалыпты өмірге оралды. Жас сарбаздар 2023 жылғы төңкеріспен билікке келген әскери хунтаға қарсы бүлік шығарып, оны адал күштер мен ресейлік әскерлер басып тастады. Бұл туралы Qazaqyia.kz порталы Associated Press басылымына сілтеме жасап хабарлайды.
Жұма күні түн ортасынан сенбі күні кешке дейін созылған қарулы қақтығыстар негізінен Ниамейдегі басты әуежай мен президент сарайы орналасқан ауданда болды. Бүлікшілер мен хунтаға адал күштер арасындағы атыс түні бойы жалғасты.
Қақтығыс салдарынан ондаған сарбаз тұтқындалып, өлтірілді. Оларды мемлекеттік телеарнадан тікелей эфирде көрсетті. Бүлікшілердің тағдыры әзірге белгісіз, билік оларға қандай айып тағылғанын жариялаған жоқ.
Жексенбі күні қалада әскери жүк көліктері мен бақылау бекеттері көрінді, әсіресе әуежай мен президент ауданы арасындағы негізгі жолдарда. Хунта жетекшісі Абдурахман Чиани әлі ешқандай мәлімдеме жасаған жоқ.
Куәгерлер мен сарапшылардың айтуынша, бүлік Дори Хамани халықаралық әуежайында басталған. Бұл әуежай стратегиялық маңызға ие, онда 101-ші әскери әуе базасы және Ресейдің Африка корпусының штаб-пәтері орналасқан. Бұл әуежайға жасалған үшінші шабуыл.
Сондай-ақ Ниамейдің Плато ауданындағы президент сарайының жанынан атыс естілді. Нигер Қорғаныс министрлігі сарбаздар тобының "жолдастарын" кепілге алғанын, бірақ жағдайдың бақылауға алынып жатқанын хабарлады.