Непалдағы жойқын су тасқынынан қаза тапқандар саны 157-ге жетті. Тағы үш адам Қытайдың Тибет аймағында қаза тапты. Бұл туралы Qazaqyia.kz порталы Reuters басылымына сілтеме жасап хабарлайды.
Апат 26 тамызда Непал мен Қытай шекарасындағы Расува таулы ауданында болды. Су, лай және тас ағындары үйлерді, жолдарды, көпірлерді, автомобильдерді және гидроэнергетика нысандарын шайып кетті. Бейнежазбаларда стихияның шекара өткеліндегі адамдарды алып кеткені көрінеді.
Непал Туризм министрлігінің соңғы деректері бойынша, 400-ден астам турист хабарсыз кеткен. Олардың шамамен 340-ы — шетел азаматтары. Непалдың Туризм кеңесінің өкілі Сунил Шарманың айтуынша, хабарсыз кеткендер арасында Германия, Испания, Нидерланд, Малайзия, Оңтүстік Африка және басқа елдердің туристері бар. Сонымен қатар, Оңтүстік Корея гидроэлектростанция құрылысында жұмыс істеген сегіз азаматының жоғалғанын хабарлады.
Тибет аумағында кемінде үш адам қаза тапты, тағы 265 адам хабарсыз кетті. Гьиронг шекара бекетіне опырылып түскен көшкін жолдарды, байланыс және электр желілерін зақымдады.
Болжам бойынша, су тасқыны мұздықтың бір бөлігінің құлауынан болған. Онымен бірге аңғарға тастар мен топырақ құлап, қуатты су мен лай ағынын тудырған. Сарапшылардың деректері бойынша, мұздық шамамен 5,2 мың метр биіктікте бөлініп, 1,2 мың метрге төмен құлаған. Ағын Лхенде-Кхола, Бхоте-Коши және Тришули өзендерімен өткен. Бір учаскеде су деңгейі жарты сағат ішінде тоғыз метрге көтерілген.
Апаттан сәл бұрын бұл аймақта магнитудасы 4,4 жер сілкінісі болған. Ол мұздықтың құлауына себеп болуы мүмкін, бірақ бұл нұсқа әзірге расталмаған.
Құтқарушылар хабарсыз кеткендерді іздеуді жалғастыруда. Жұмысты қираған жолдар, лай және су деңгейінің жоғары болуы қиындатып отыр. Тікұшақтар әзірге кейбір зардап шеккен аудандарға қона алмай отыр.
Бұған дейін «Курсив» ҚР Сыртқы істер министрлігінің хабарлауынша, қазақстандықтардың бұл тізімдерде жоқ екенін жазған болатын.
«Қазіргі уақытта Непал мен Қытай шекарасындағы су тасқынынан зардап шеккендер мен хабарсыз кеткендер арасында Қазақстан азаматтары жоқ», — деді «Курсивке» СІМ ресми өкілі Жанболат Усенов.
СІМ жағдайдың министрліктің бақылауында екенін қосты.