2025 жылы Халықаралық ақпараттық технологиялар университеті (ХАТУ) таза пайдасын өткен жылмен салыстырғанда 500 млн теңгеге азайтып, 1,2 млрд теңгеге жеткізді. Бұл акционерлерден алынған қарыздар бойынша шығыстарға байланысты. Университеттің негізгі иесі Нұрсұлтан Назарбаевтың білім беру қоры болып табылады. Бұл туралы Qazaqyia.kz порталы Kursiv Media басылымына сілтеме жасап хабарлайды.
IT-университеттің 2025 жылғы пайдасы 1,19 млрд теңгені құрады. Өткен жылмен салыстырғанда ол 30%-ға немесе 507 млн теңгеге қысқарды. Сонымен қатар, университеттің білім беру және ғылыми-зерттеу қызметінен түскен кірісі 4,8%-ға өсіп, 7,4 млрд теңгені құрады.
Университетке ең көп кірісті бакалавриат студенттері әкелді – 6,3 млрд теңге (өсім 5,6%). Магистранттарды оқытуға 126 млн теңге, докторанттарға 123 млн теңге кетті.
Көрсетілген білім беру қызметтерінің өзіндік құны 4,87 млрд теңгені құрады. Өткен жылмен салыстырғанда ол 11,7%-ға немесе 508 млн теңгеге өсті. Әкімшілік шығыстар 251 млн теңгеге ұлғайып, 1,4 млрд теңгеге жетті.
Алайда ХАТУ-дың түпкілікті пайдасына ең үлкен соққыны қаржыландыру шығыстары келтірді. Олар 600 млн теңгені құрап, бір жыл ішінде екі еседен астам өсті. Бұл шығыстардың негізгі бөлігі университет алған қарыздар бойынша дисконттың амортизациясына келді.
2024 жылы ХАТУ өз акционерлерінен бес жыл мерзімге 5,86 млрд теңгеден астам сомаға пайызсыз, кепілсіз қарыздар алды. Бұл қаражатты университет Алматыдағы ғимараттарды сатып алу үшін пайдаланды: Абай даңғылы, 52в – ХАТУ тіл кафедрасы орналасқан «Bayzak» бизнес-орталығы және Абай даңғылы, 52г – Инновациялық техникалық колледж орналасқан ғимарат.
2025 жылы университет акционерлер – жеке тұлғалар алдындағы қарыздарды 176,7 млн теңгеге мерзімінен бұрын өтеді. Сондай-ақ ХАТУ өзінің негізгі акционері – Nursultan Nazarbayev Educational Foundation қоры алдындағы қарызды 2,6 млрд теңгеге ішінара өтеді.
Есептілікке сәйкес, ХАТУ-дың негізгі акционері Қазақстанның тұңғыш президентімен байланысты Nursultan Nazarbayev Educational Foundation немесе «Нұрсұлтан Назарбаевтың білім беру қоры» болып табылады, оған акциялардың 85%-ы тиесілі. Тағы 10% Мадина Бектурғановаға – «Қазақтелеком» бұрынғы басшысы Қуанышбек Есекеевтің жұбайына, ал 5% Бауыржан Сағадиевке тиесілі.
Бұған дейін 2025 жылы Халықаралық ақпараттық технологиялар университетінің (ХАТУ) басқармасы жиынтығы 147,4 млн теңге алғаны хабарланған болатын – бұл бір жыл бұрынғыдан 44,6%-ға аз.