Мәдениет және ақпарат министрлігі Мемлекеттік Туды пайдалану тәртібін түсіндірді. Бұл туралы Qazaqyia.kz порталы Sputnik Қазақстан басылымына сілтеме жасап хабарлайды.
Бұған дейін үкімет мемлекеттік рәміздерді пайдалану қағидаларына өзгеріс енгізген болатын. Енді Туды ғимараттарға, соның ішінде балкондарға да 45 градус бұрышпен ілуге болады.
«Бұл норма 2020 жылдан бері заңнамада болғанымен, балконға орналастыру тәртібі осы уақытқа дейін нақты айқындалмаған еді», – деп түсіндірді министрлік мамандары.
Жеке тұрғын үйлерде Ту жерден кемінде үш метр биіктікте орнатылуы керек. Сондай-ақ, түнгі уақытта оған жарық түсіру талабы алынып тасталды.
Егер ғимараттың қасбетіне орналастыру мүмкін болмаса, Туды ауладағы ту тұғырына (флагштокқа) орнатуға болады. Сонымен қатар, мемлекеттік рәміздер туралы заң талаптары сақталған жағдайда Мемлекеттік Туды көлік салонында пайдалануға рұқсат етіледі.
«Мемлекеттік Туды жарнамалық мақсатта пайдалануға, сондай-ақ оны киім-кешекке, төсек-орын жабдықтарына, пердеге, дастарқанға, төсенішке және тұрмыстық мақсаттағы өзге де бұйымдарға орналастыруға тыйым салынады. Бұл талап мемлекеттік рәміздің бейнесін күнделікті тұрмыста орынсыз пайдаланудың алдын алып, оған деген құрметті сақтауға бағытталған», – делінген ресми хабарламада.
Бұған дейін спорттық киімдерге тек Мемлекеттік Елтаңбаның бейнесін орналастыруға рұқсат етілсе, енді оларға Мемлекеттік Туды да салуға болады. Бұл талап спорттық киімдер мен өзге де арнайы киім үлгілеріне қатысты.