АҚШ-тың Нью-Мексико штатындағы сот Meta компаниясын Facebook пайдаланушыларын дербес деректерді қорғауға қатысты алдағаны үшін 25 млрд доллар айыппұл төлеуге міндеттеді. Бұл іс миллиондаған пайдаланушының ақпаратына келісімсіз қол жеткізген Cambridge Analytica жанжалына байланысты. Бұл туралы Qazaqyia.kz порталы Kursiv Media басылымына сілтеме жасап хабарлайды.
Айыппұл мөлшері туралы шешімді 21 қазанда судья Фрэнсис Мэтью шығарды. Ол 219 млрд доллардан астам соманы негізді деп тапты, бірақ оны 25 млрд долларға дейін қысқартты. Нью-Мексико штатының бас прокуроры Рауль Торрес бұл шешімді АҚШ тарихындағы жекелеген штаттың компанияға қарсы ісі бойынша ең ірі шешімдердің бірі деп атады.
«Facebook-тің көп жылдар бойы жүргізілген және қоғамға жүйелі түрде таратылған құқыққа қарсы әрекеттері Facebook-тің негізгі бизнес-тәжірибелерінің мәніне қатысты», — деп жазды судья Фрэнсис Мэтью қаулыда.
Нью-Мексико билігі сотқа 2021 жылы шағым түсірген. Бұған британдық консалтингтік Cambridge Analytica компаниясының үшінші тарап қосымшасы арқылы 87 млн-ға дейінгі Facebook пайдаланушысының дербес деректерін жинағаны туралы мәліметтер себеп болды.
Компания 2016 жылы Дональд Трамптың президенттік науқанында жұмыс істеп, алынған ақпаратты сайлаушылардың профильдерін жасау және саяси жарнаманы мақсатты бағыттау үшін пайдаланған.
Штат билігі Meta пайдаланушыларды үшінші тұлғалардың олардың деректеріне қол жеткізуі туралы алдағанын мәлімдеді. Сондай-ақ шағымдар компанияның өшпенділік пен дезинформацияға қарсы күрес туралы мәлімдемелеріне де қатысты болды.
25 қыркүйекте алқабилер Meta мен оның басшылығының қаралған 29 мәлімдемесінің 26-сын алдау деп таныды. Олар штаттың тұтынушыларды қорғау туралы заңнамасының 43 млн-нан астам бұзылғанын анықтады.
Нью-Мексико заңы әрбір бұзушылық үшін 5 мың долларға дейін айыппұл қарастырады. Торрестің айтуынша, өндірілген қаражат штаттың мектеп жүйесіне түсуі тиіс.
Компания шешімге шағымдануды жоспарлап отыр. Meta-ның бас заң кеңесшісі Си Джей Махони апелляциялық сотта жеңіске сенімді екенін мәлімдеді.
«Бұл шешім, сондай-ақ бас прокурордың оны орындау тәсілі Нью-Мексико штатында бизнес жүргізуді іс жүзінде мүмкін емес етеді», — деді Махони.
Сот құжаттарында Meta айыппұлды 3,45 млрд доллармен шектеуді сұраған. Компания пайдаланушылардың деректерін сатпайтынын, ал штат билігі нақты тұтынушылардың алданғанын дәлелдей алмағанын мәлімдеді. Сондай-ақ Meta миллиардтаған айыппұлдың оның конституциялық құқықтарын бұзуы мүмкін екенін айтты.
Тағайындалған сома Cambridge Analytica-ға қатысты іс бойынша компания үшін ең үлкен айыппұл болды. 2019 жылы АҚШ Федералдық сауда комиссиясы Facebook-ті сол жанжал үшін 5 млрд долларға айыппұл салған болатын.