АҚШ-тың бірінші ханымы Мелания Трамп Ақ үйде Ресей мен Украина өкілдерін қабылдады. Кездесу Ресей бақылауындағы украиндық Олешки қаласындағы гуманитарлық операцияға арналды, деп хабарлайды Associated Press. Бұл туралы Qazaqyia.kz порталы Kursiv Media басылымына сілтеме жасап хабарлайды.
Ресейді кездесуде Владимир Путиннің арнайы өкілі Кирилл Дмитриев пен омбудсмен Яна Лантратова өкілдік етті. «Интерфакс» агенттігінің мәліметінше, олардың қатысуын кездесу алдында Ресей президентінің баспасөз хатшысы Дмитрий Песков растаған.
Украина тарапынан Жоғарғы Рададағы «Слуга народа» фракциясының жетекшісі Давид Арахамия мен омбудсмен Дмитрий Лубинец келді. Олардың сапары туралы бұған дейін «Укринформ» хабарлаған.
Мелания Трамп Арахамия мен Дмитриевке Владимир Зеленский мен Владимир Путинге арналған хаттарды тапсырды.
АҚШ президенті Дональд Трамп кездесуге қатысқан жоқ.
«Біз соғыстың орнына адамгершілікті таңдадық», — деді бірінші ханым. Ол тараптарды бейбіт тұрғындарға көмектесу үшін диалогты жалғастыруға шақырды, деп хабарлайды Reuters.
Бұған дейін «Курсив» жазғандай, келісім Олешкиге азық-түлік, су және дәрі-дәрмек жеткізуді көздеген. Бітім 27 қазаннан 1 қарашаға дейін күшінде болды. Ол басталғанда ресей әскерлерінің бақылауындағы қалада шамамен 2 мың адам қалған. Тұрғындардың бір бөлігі Киев бақылауындағы аумаққа көшкен. Украина билігі қауіпсіздік мақсатында эвакуацияланғандардың санын жарияламады.
Кездесуден үш күн бұрын Владимир Зеленский Мелания Трампты Украинаға гуманитарлық қолдауы және соғыстан зардап шеккендерге көмегі үшін княгиня Ольга I дәрежелі орденімен марапаттаған.
АҚШ, Ресей және Украина арасындағы келіссөздердің жеке раунды 10–11 қарашада Абу-Дабиде өтеді деп жоспарланған. АҚШ президентінің арнайы өкілі Стив Уиткоффтың айтуынша, тараптар соғыстан кейінгі қауіпсіздік, шиеленісті төмендету және гуманитарлық бастамаларды талқылайды.