Мектеп оқушысының рюкзагы оқулықтармен және керек-жарақтармен қоса бала дене салмағының 10 пайызынан аспауы керек. Бұл туралы Qazaqyia.kz порталы Kursiv Media басылымына сілтеме жасап хабарлайды.

Мысалы, егер оқушының салмағы 30 кг болса, толық жиналған рюкзак 3 кг-нан ауыр болмауы тиіс.

Сонымен қатар, рюкзактың өзін есептемегенде, күнделікті оқулықтар мен дәптерлер жиынтығының салмағына жеке нормалар белгіленген.

Бос рюкзактың өзі, мамандардың ұсынысы бойынша, 1 кг-нан аспауы керек.

«Мамандар рюкзакты баламен бірге таңдауды ұсынады. Сатып алар алдында рюкзакты киіп көріп, оның оқушының бойына сәйкес келетініне және арқаға ыңғайлы орналасатынына көз жеткізген жөн», — делінген ДСМ хабарламасында.

Таңдау кезінде рюкзактың құрылымына да назар аудару кеңес беріледі. Оның тығыз арқалығы, ені мен ұзындығы реттелетін жұмсақ және кең белдіктері, жарық шағылыстыратын элементтері болуы және берік, ылғал өткізбейтін материалдан жасалғаны маңызды.

«Сондай-ақ рюкзактың өз салмағын ескеру қажет. Ол неғұрлым жеңіл болса, балаға түсетін қосымша жүктеме соғұрлым аз болады. Мамандар бос рюкзактың салмағы бір килограмнан аспауын ұсынады. Рюкзак тым үлкен болмауы немесе белден едәуір төмен салбырап тұрмауы керек», — деп түсіндірді министрлікте.

Ата-аналарға рюкзактың ішін үнемі тексеріп, сабақта қажет болмайтын ойыншықтарды, артық кітаптарды, дәптерлерді және басқа заттарды алып тастау ұсынылады.

Бала рюкзакты екі иығына да асып жүруі керек, сонда жүктеме біркелкі бөлінеді. Егер мектепте шкафтар немесе заттарды сақтайтын басқа орындар болса, оқулықтар мен керек-жарақтардың бір бөлігін сонда қалдыруға кеңес беріледі.

Бұған дейін «Курсив» Астанада 1 қыркүйекке қарай «Мектепке жол» акциясы аясында 8,5 мыңнан астам оқушыға рюкзак пен оқу құралдары тегін берілетінін жазған. Көмек аз қамтылған және көп балалы отбасылардың балаларына, жетім балаларға және ата-анасының қамқорлығынсыз қалғандарға арналған.

Сонымен қатар, «Жалпыға бірдей білім» қоры арқылы мектеп формасын, аяқ киім мен кеңсе тауарларын сатып алуға материалдық көмек қарастырылған. Оны алу үшін астаналық мектептерге 5 мыңнан астам өтініш түскен.

Егер мақала сізде алаңдаушылық тудырса, оны жасанды психологпен талқылаңыз.