Маңғыстау облыстық көпбейінді ауруханасына жеткізілген әскери қызметшінің жағдайы ауыр. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Облыстық денсаулық сақтау басқармасының мәліметінше, қазіргі уақытта науқас дәрігерлердің тұрақты бақылауында. Оған барлық қажетті медициналық көмек толық көлемде көрсетіліп жатыр.
"Әскери қызметшінің қазіргі жағдайы тұрақты ауыр деп бағаланып отыр. Мамандар қажетті емдеу шараларын жалғастырып, науқастың денсаулық жағдайын тұрақты бақылауда ұстап отыр", — дейді басқармада.
Жағдай Маңғыстау облысының денсаулық сақтау басқармасының бақылауында.
Еске сала кетейік, Маңғыстау облысында оқу-жаттығу кезінде төтенше жағдай болып, 9 адам көз жұмды. 24 қыркүйек күні ауа райының күрт нашарлауы және желдің күшеюі салдарынан Каспий теңізіндегі 19 әскери қызметшіні толқын алып кеткен.
Қазіргі уақытта оның 9-ы көз жұмғаны анықталды. Үш әскери қызметші құтқарылды, олардың біреуі ауруханаға жатқызылды. Қалғандарын іздестіру жұмыстары жүргізіліп жатыр.
Қайғылы оқиғаға байланысты дереу үкіметтік комиссия құрылды. Президент 25 қыркүйекті Қазақстанда аза тұту күні деп жариялады.