Маңғыстау облысының ТЖД өнеркәсіптік қауіпсіздік басқармасы «Tenge Oil&Gas» ЖШС нысандарында жоспардан тыс тексеру бастады. Бұл туралы Qazaqyia.kz порталы Kursiv Media басылымына сілтеме жасап хабарлайды.
Компания «Тенге» кен орнында өндіріс жүргізеді. Инспекторлар компания басшылығының бұрын анықталған бұзушылықтарды жойғанын тексереді.
Қазіргі уақытта мамандар ұсынылған есептік деректердің өндірістегі нақты жағдайға сәйкестігін зерттеп жатыр. Сондай-ақ, ЖШС басшылығының қауіпсіздік саласындағы ескертулерді қаншалықты сапалы орындағаны тексерілуде.
«Тексеру қорытындылары кәсіпорынның өндірістік қуаттарды одан әрі қауіпсіз пайдалануға дайындығын көрсетеді», — деп атап өтті Өнеркәсіптік қауіпсіздік комитетінде.
Егер бұзушылықтар жойылмағаны анықталса, компания заңға сәйкес әкімшілік жауапкершілікке тартылады.
Алдыңғы тексеру 2023 жылы жүргізілген болатын. Сонда мамандар газ пунктін, мұнай жинау пунктін, мұнай дайындау қондырғысын, химзертхананы және ұңғымаларды қоса алғанда, 30 нысанды тексерген.
Бақылау қорытындысы бойынша инспекторлар өнеркәсіптік қауіпсіздік саласындағы 27 бұзушылықты анықтап, кәсіпорынға анықталған бұзушылықтарды жою туралы нұсқама берген.
2010-шы жылдары «Tenge Oil&Gas» компаниясы қазақстандық миллиардер Тимур Қуанышевке тиесілі болған. Ол TNG Holding құрылымы арқылы Тенге және Оңтүстік Маңғышалақ кен орындарын басқарған. Қазір құрылтайшылар құрамы өзгерді.
kompra.kz деректеріне сәйкес, «TENGE Oil & Gas» ЖШС-нің тікелей иесі де «TNG Holding» ЖШС болып табылады. Екі құрылымды да Чэнь Цинцзюнь басқарады. Холдингтің өзі екі заңды тұлғаға тиесілі.
Өз кезегінде, кен орны ірі қытайлық мұнайсервистік корпорация Zhongman Petroleum and Natural Gas Group (ZPEC) компаниясымен байланысты. ZPEC ресми сайтында «Тенге» корпорацияның негізгі шетелдік активтерінің бірі ретінде көрсетілген. Қазақстанның Өнеркәсіп министрлігінің деректері бойынша, бұл кен орнындағы мұнай мен газ қоры алдағы 24 жылға жетеді.
Бұған дейін «Курсив» Қазақстандағы ірі мұнай кен орны операторында бұзушылықтар анықталғанын жазған болатын.