Маңғыстау облысында жыл басынан бері қарақұрт шаққан 18 адам медициналық көмекке жүгінді. Бұл туралы Qazaqyia.kz порталы Lada.kz басылымына сілтеме жасап хабарлайды.
Ақтау тұрғындары әлеуметтік желіде балалар ойын алаңдарының жанында улы өрмекшілердің пайда болғанын көрсететін бейнежазбалар жариялауда. Қала тұрғындары биліктен шара қолдануды сұрайды, өйткені қарақұрттар қалалық ортада жиі кездесе бастады.
15 маусымда Маңғыстау облысының әкімдігінде облыс әкімінің орынбасары Аббат Урисбаевтың төрағалығымен арнайы кеңес өтті. Оған медициналық ұйымдардың басшылары, санитарлық-эпидемиологиялық бақылау департаментінің өкілдері және салалық мамандар қатысты.
Мамандардың айтуынша, биыл мол жауын-шашынның салдарынан қарақұрттар әдеттегіден ерте пайда болып, олардың саны айтарлықтай өскен.
Сонымен қатар, өңірдегі бірқатар медициналық ұйымдарда қарақұрт уына қарсы арнайы сарысудың жеткілікті қоры жоқ. Осыған байланысты зардап шеккендерді облыс орталығының медициналық мекемелеріне жеткізуге тура келеді.
Кеңес қорытындысы бойынша әкімдік зардап шеккендерге уақтылы медициналық көмек көрсетуді және қарақұрт шағуының алдын алуды күшейтуді тапсырды. Атап айтқанда, облыстың барлық қалалары мен аудандарында қарақұртқа қарсы сарысудың қорын қалыптастыру, халық арасында түсіндіру жұмыстарын күшейту, аулалар мен шаруашылық аумақтарын тазалауды ұйымдастыру, сондай-ақ дезинсекциялық іс-шараларды жүргізу қажет.
Балабақшаларда, жазғы сауықтыру лагерьлерінде және басқа да балалар мекемелерінде қауіпсіздікке ерекше назар аудару тапсырылды. Мамандар құрғақ шөп пен өсімдіктерді жинау кезінде сақтық шараларын сақтау қажеттігін еске салды.
Маңғыстау облыстық балалар ауруханасының директоры Жанар Досжанова соңғы он күнде ауруханаға қарақұрт шаққан екі бала түскенін хабарлады.
«Балаларда шаққан жерде қатты ауырсыну, дененің әртүрлі бөліктерінде ауырсыну, жүрек айну, құсу, дене қызуының көтерілуі және айқын мазасыздық байқалды. Сондықтан ата-аналар балалардың ойын алаңдары мен демалыс орындарындағы қауіпсіздігіне ерекше назар аударуы керек. Қазіргі уақытта балалар қажетті ем алып жатыр, олардың жағдайы тұрақтанды», — деп атап өтті Досжанова.
Кеңес қорытындысы бойынша Урисбаев жауапты ведомстволарға қарақұрттармен күрес бойынша профилактикалық іс-шараларды күшейтуді, қажетті препараттардың қорын толықтыруды және халық арасында ақпараттық-түсіндіру жұмыстарын жүйелі түрде жүргізуді тапсырды.
Бұған дейін «Курсив» әлеуметтік желілерде Атырау тұрғындарының масалар мен шіркейлердің көптігіне шағымданғаны туралы хабарлаған болатын.