Павлодар облысында марқұм туыстарының денесімен бірге тұрған екі әйел есі дұрыс емес деп танылып, мамандандырылған психиатриялық диспансерге жатқызылды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Қарт ана мен оның үлкен қызы марқұмдардың денесін қорлау және алаяқтық жасады деп күдікке ілінген болатын. Тергеу олардың қайтыс болған отбасы басшысының зейнетақысын алып отыруы мүмкін бе деген мәселені тексерген. Телеарнаның мәліметінше, қылмыстық іс жабылып, әйелдер сот алдында жауап бермейтін болды.
«Осы факті бойынша полиция қылмыстық іс қозғаған болатын. Барлық қажетті тергеу әрекеттері жүргізілді. Жүргізілген қажетті зерттеулер кешенінің қорытындысы бойынша екі әйел де есі дұрыс емес деп танылды. Екеуі де мамандандырылған психиатриялық диспансерге орналастырылды», — деп хабарлады Павлодар облысының полиция департаменті.
«Майқайың мумиялары» туралы оқиға ақпан айының басында белгілі болды. Бір отбасыға тиесілі екі жеке үйде 67 жастағы зейнеткер мен оның 39 жастағы кіші қызының мумияланған денелері табылды.
КТК мәліметтері бойынша, ер адамның сүйегі бөлмеде шамамен жарты жыл жатқан. Оның қызының денесі екінші үйден табылды, онда оның алты жасар қызы, әжесі және апасы тұрған. Телеарнаның хабарлауынша, қабірлердегі тақтайшаларға қарағанда, әйел денесі табылғанға дейін шамамен екі жыл бұрын қайтыс болған. Ол тірі кезінде ауыр дертпен ауырған.
Ауыл тұрғындарының әңгімелеуінше, қыз анасының денесін күтіп, оны бал мен маймен майлап отырған. Бала балабақшаға бармаған — оған сауаттылықты әжесі мен апасы үйреткен.
Марқұмдардың денесі табылғаннан кейін олар жерленді. Қыз басқа отбасының қамқорлығына берілді.