Қазақстанның жасанды интеллект және цифрлық даму министрі Жаслан Мәдиев Binance компаниясының негізін қалаушы Чанпэн Чжаомен (CZ) кездесіп, технологиялар мен цифрлық экономиканы дамыту мәселелерін талқылады. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Кездесу барысында Binance делегациясына AlatauCity-дегі CryptoCity тұжырымдамасы және Қазақстанның жасанды интеллект саласындағы өңірлік хаб ретіндегі позициясын нығайтуға бағытталған Data Center Valley ("Дата-орталықтар алқабы") жобасы таныстырылды. Бұл туралы Цифрлық даму министрлігі хабарлады.
Мәдиевтің айтуынша, Қазақстан бүгінде цифрлық активтер нарығын дамытудың келесі кезеңіне – реттеуші ортаны қалыптастырудан инфрақұрылым мен практикалық шешімдер құруға көшіп жатыр.
"Біздің міндетіміз – жаңа қаржы технологиялары экономиканы дамытуға, инвестиция тартуға және жаңа цифрлық сервистердің пайда болуына ықпал ететін жағдай қалыптастыру. Жаһандық технологиялық компаниялармен әріптестік бастамаларды нақты жүзеге асыруға жеделірек көшуге мүмкіндік береді", – деді Жаслан Мәдиев.
Кездесуде Binance Pay компаниясының Alatau City Bank-пен серіктестігі таныстырылып, Жасанды интеллект және цифрлық даму министрлігімен және "Астана" халықаралық қаржы орталығымен (АХҚО) екі меморандумға қол қойылды.