Көкшетаулық курьер алтын құймаларын тасымалдағаны үшін 3 жылға сотталды, бірақ ол құймалар туралы білмеген. Алайда кассациялық сот білмеуді ақтауға негіз деп танымады. Бұл туралы Qazaqyia.kz порталы Kursiv Media басылымына сілтеме жасап хабарлайды.
Сот анықтағандай, 2021 жылдан 2023 жылға дейін кәсіпкер Т. заңсыз таза алтын сатып алып, одан зергерлік бұйымдар жасап, сатып отырған. Заңсыз әрекеттен түскен табыс 224 миллион теңгеден асқан.
Кәсіпкер Т.-да жұмыс істеген Б. оның тапсырмасы бойынша Шымкентке жалпы салмағы 744 граммға жуық алтын құймалары бар буманы жөнелтуді ұйымдастырған.
Алайда заңсыз схема ашылды. Бірінші сатыдағы сот кәсіпкерді бағалы металдардың заңсыз айналымы, ерекше ірі кіріс алған заңсыз кәсіпкерлік және қылмыстық ақшаны заңдастыру бойынша кінәлі деп таныды.
Нәтижесінде кәсіпкер Т.-ға 4 жыл бас бостандығынан айыру, мүлкін тәркілеу және бағалы металдар айналымы саласындағы қызметпен айналысу құқығынан 5 жылға айыру жазасы тағайындалды.
Ал курьер Б. ерекше ірі мөлшердегі бағалы металдарды заңсыз тасымалдағаны үшін 3 жылға бас бостандығынан айырылды.
Сотталушылардың қорғаушылары сот актілерін жоюды сұрады. Т.-ның адвокаты бизнес заңды жүргізілгенін, ал табыс делдалдық қызметтің нәтижесі екенін мәлімдеді. Б.-ның қорғаушысы оның тасымалданған буманың ішінде не бар екенін білмегеніне сілтеме жасады.
Алайда Кассациялық сот сотталушылардың кінәсі толық дәлелденгенін анықтады.
«Қылмыстық және қылмыстық-процестік заңның сот актілерін жоюға немесе өзгертуге әкеп соғатын бұзушылықтары анықталған жоқ. Тағайындалған жаза заңды және әділ деп танылды, сондықтан сот актілері өзгеріссіз қалдырылды», — деп түйіндеді сот.
Бұған дейін «Курсив» телефон алаяқтарының курьері 4 жыл түрмеге сотталғанын жазған.