Көкшетау тұрғыны ауладағы орындықтан 3,4 млн теңге тұратын зергерлік бұйымдар салынған сөмкені тауып алып, ұрлық ісі бойынша қылмыстық жауапкершілікке тартылды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Ақмола облысы полиция департаментінің мәліметінше, Абылай хан даңғылындағы үйдің ауласындағы орындыққа сөмкесін ұмытып қалған әйел арызданған. Ол көп ұзамай қайтып келгенде, заттары жоғалып кеткенін анықтаған.
Полиция қызметкерлері оқиға орнындағы бейнебақылау камераларының жазбаларын зерттеген. Бейнежазбадан сөмкені алып кеткен әйелді анықтау мүмкін болды. Ол біраз уақыт иесінің қайтып келуін күткен, бірақ кейін сөмкені өзімен бірге алып кеткен. Үйіне бара жатқан жолда ол сөмкені тастап, телефонды, сағатты және зергерлік бұйымдарды өзіне қалдырған.
Келесі күні ол алтын сақиналардың бірін 150 мың теңгеге ломбардқа өткізген. Өз сөзіне қарағанда, ақшаны азық-түлік пен дәрі-дәрмекке жұмсаған.
«Ұрлық фактісі бойынша сотқа дейінгі тергеу жүргізілуде, тергеу амалдары жалғасуда», — деп хабарлады облыстық ПД.
Полиция тапқан мүлікті иемдену де ұрлық болып саналатынын және заң бойынша жауапкершілікке тартылатынын еске салды. Табылған заттарды иесіне қайтару немесе жақын маңдағы полиция бөліміне тапсыру қажет.
Бұған дейін «Курсив» Жетісу тұрғыны жарты миллион теңгеге шоколад ұрлағанын хабарлаған болатын.