Маңғыстау облысының Түпқараған ауданында Каспий теңізінің жағасында Төтенше жағдайлар министрлігі құтқару операциясын жүргізді. Ауа райының нашарлауы салдарынан адамдар отырған үрлемелі қайық жағадан алыстап кетті. Бұл туралы Qazaqyia.kz порталы Kursiv Media басылымына сілтеме жасап хабарлайды.
Оқиға өткен түнде болған. Резина қайықта үш адам болды. Қатты екпінді жел олардың жағаға жету жолын кесіп, жүзу құралын ашық теңізге алып кетті. Із-түзсіз жоғалған азаматтарды іздеуге құтқару бөлімшелері дереу аттанды.
Ведомство қызметкерлері алып кетілген қайықты жедел тауып, барлық жолаушыларды аман-есен құрлыққа жеткізді. Құтқарылғандар медициналық көмекке мұқтаж болған жоқ. Мамандар азаматтарға судағы қауіпсіздік ережелерін сақтау қажеттігін тағы да еске салды. Жел күшейген кезде теңізге шығуға қатаң тыйым салынады.
24 қыркүйекте Каспий теңізінің жағасында Әскери-теңіз күштерінің оқу-жаттығуы кезінде ауа райы нашарлап, жел күшейді. Нәтижесінде әскери қызметшілер тобын теңізге алып кетті. Маңғыстау облысы әкімдігінің нақтыланған деректері бойынша, суға 17 адам түскен. Олардың 14-і қаза тапты. Оқиға орнында вице-премьер Қанат Бозымбаев басқаратын үкіметтік комиссия жұмыс істеп жатыр. Ол іздеу жұмыстарын тәулік бойы жүргізуді және қаза тапқандардың отбасыларына қажетті көмек көрсетуді тапсырды. Оқиғаның себептері мен мән-жайы қылмыстық іс аясында анықталуда.
Президент Қасым-Жомарт Тоқаев қаза тапқан әскери қызметшілерді еске алу үшін 25 қыркүйекті жалпыұлттық аза тұту күні деп жариялаған болатын.