«Хазар Қорғаны – 2026» оқу-жаттығуы кезінде Каспийде 14 әскери қаза тапқан оқиғаға байланысты Қорғаныс министрлігінің бес лауазымды тұлғасы ұсталды. Күдіктілердің қатарында Қазақстан Әскери-теңіз күштері бас қолбасшысының бірінші орынбасары және жеке құрамды түсіру жүргізілген «Қайсар» катерінің командирі бар. Бұл туралы Qazaqyia.kz порталы Kursiv Media басылымына сілтеме жасап хабарлайды.
Ұсталғандар кімдер
Ішкі істер министрлігінің деректері бойынша, ұсталғандар ауыр зардаптарға әкеп соққан қызметке немқұрайлы қарау және кеме жүргізу ережелерін бұзу бойынша күдікке ілінген.
«Ұсталғандардың қатарында — ҚР Қарулы Күштері Әскери-теңіз күштері бас қолбасшысының бірінші орынбасары — штаб бастығы, екі әскери бөлімнің командирлері, сондай-ақ теңіз жаяу әскері ротасының және «Қайсар» катерінің командирлері бар. Олардың барлығы күдікті деп танылып, Ақтау қаласы полиция басқармасының уақытша ұстау изоляторына қамалды», — деп хабарлады ІІМ.
Тергеу барысы
ІІМ-нің әскери-тергеу бөлімшесі сотқа дейінгі тергеп-тексеру жүргізіп жатыр. Тергеу деректері бойынша, 24 қыркүйекте Ақтаудан 43 км қашықтықта оқу-жаттығу кезінде күрделі ауа райы жағдайында «Қайсар» катерінен түсіру кезінде әскери қызметшілерді теңіз ағысы алып кеткен.
Тергеушілер оқу-жауынгерлік міндетті өткізу туралы шешімнің қалай қабылданғанын және қауіпсіздік талаптарының сақталғанын анықтап жатыр. Сондай-ақ ауа райы жағдайларының ескерілген-ескерілмегені, катердің қандай техникалық жағдайда болғаны және оқу-жаттығу мен әскери қызметшілердің қауіпсіздігіне жауапты лауазымды тұлғалардың қалай әрекет еткені тексеріліп жатыр.
Тергеу ІІМ мен Бас прокуратураның ерекше бақылауында.
Бұған дейін не болды
Бұған дейін «Курсив» 24 қыркүйекте Каспийде Әскери-теңіз күштерінің оқу-жауынгерлік міндеттерін орындау кезінде кенеттен болған дауыл мен екпінді желдің салдарынан 17 әскери қызметшінің ашық теңізге ағып кеткенін жазған. Апат салдарынан 14 адам қаза тапты.
Апаттың себептерін анықтау үшін Премьер-министр орынбасары Қанат Бозымбаев басқаратын үкіметтік комиссия құрылды. Немқұрайлылық және кеме жүргізу ережелерін бұзу баптары бойынша қозғалған қылмыстық іс Бас прокуратураның ерекше бақылауында.
Сарбаздардың қаза болуына байланысты президент Қасым-Жомарт Тоқаев 25 қыркүйекті Қазақстанда жалпыұлттық аза тұту күні деп жариялады.
Бас прокуратурада 30 әскери қызметшіден жауап алынып, күдіктілердің шеңбері анықталғанын хабарлады.