Қазақстан мен Әзербайжан арасында Каспий теңізінің түбімен талшықты-оптикалық байланыс кабелін тарту жұмыстары басталды. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Жасанды интеллект және цифрлық даму министрлігінің ресми сайтына сілтеме жасаған Sputnik Қазақстанның хабарлауынша, бұған дейін теңіз түбі зерттеліп, якорь тұрағы мен әскери оқу-жаттығу аймақтарын айналып өтетін оңтайлы бағыт анықталған.
Ал Қытайда ROPA типті оптикалық күшейткіштері бар арнайы брондалған кабель өндіріліп, зауыттық сынақтан сәтті өтті.
Оптикалық кабель алдымен Құрық портына жеткізілген. Сол жерде ол логистикалық кемеге тиеліп, Бакуге жеткізілді.
Бүгінде барлық цифрлық артерия тікелей кемедегі арнайы кабельдік танкке сәтті орналастырылды.
Осылайша, кеме Баку портынан шығып, Ақтау порты бағытында желі құрылысын бастады, – делінген ресми хабарламада.
Бұл күрделі міндетті орындау үшін су сыйымдылығы 20 мың тоннадан асатын ең қуатты кабель төсеуші кеме тартылды.
Кеме бортында техникалық қадағалау мамандары мен "Қазақтелеком" өкілін қоса алғанда, 70 экипаж мүшесі жұмыс істеп жатыр.
Ауа райы қолайлы болған жағдайда су асты кабелін тікелей төсеу жұмыстарын 15–20 күн ішінде аяқтау жоспарланып отыр.
Ал барлық технологиялық жұмысты және іске қосу-реттеу кешенін жүзеге асырудың жалпы мерзімі 2026 жылдың соңына дейін белгіленген, – деп атап өтті мамандар.